close
Facebook Share Twitter Share WhatsApp Share Telegram Share
ధ్యానంపై ‘నాట్స్’ ఆన్‌లైన్‌ అవగాహన

లాస్‌ఏంజిల్స్‌: ధ్యానంపై అవగాహన కల్పించేందుకు ఉత్తర అమెరికా తెలుగు సంఘం (నాట్స్) ఆన్‌లైన్‌ ద్వారా అవగాహన సదస్సు నిర్వహించింది. నాట్స్ లాస్ఏంజిల్స్ విభాగం ఏర్పాటు చేసిన ఈ సదస్సుకు ఆధ్యాత్మికవేత్త సుభాష్ పత్రీజీ స్వామి హాజరై.. ధ్యానం ప్రాముఖ్యతను వివరించారు. ధ్యానం ఎందుకు చేయాలి? ధ్యానం మనల్ని ఎలా శక్తిమంతులుగా తీర్చిదిద్దుతుంది? మనస్సును ఎలా నియంత్రణలో ఉంచుతుంది? ధ్యానం ఎలా చేయాలి? తదితర అంశాలపై అవగాహన కల్పించారు. ధ్యానం మనిషిని ఉన్న స్థితి నుంచి ఉన్నత స్థితికి ఎలా తీసుకెళ్తుందో వివరించారు. హింస నుంచి అహింస వైపు ధ్యానం మనల్ని ఎలా మళ్లిస్తుంది? అజ్ఞానం నుంచి ఆత్మజ్ఞానం వైపు; మానవత్వం నుంచి దైవత్వం వైపు ధ్యానం నడిపిస్తుందని పత్రీజీ సవివరంగా చెప్పుకొచ్చారు.

ఈ సందర్భంగా పలువురు అడిగిన ప్రశ్నలకు ఆయన సమాధానాలు ఇచ్చారు. ఆధ్యాత్మికత, ధ్యానానికి సంబంధించిన ఎన్నో సందేహాలను పత్రీజీ నివృత్తి చేశారు. ఈ కార్యక్రమానికి రాజ్యలక్ష్మి చిలుకూరి వ్యాఖ్యతగా వ్యవహరించారు. నాట్స్ లాస్ఏంజిల్స్ సమన్వయకర్త శ్రీనివాస్ చిలుకూరి, సంయుక్త సమన్వయకర్త మనోహర్ మద్దినేనితో పాటు శంకర్ సింగంశెట్టి తదితర నాట్స్ నాయకులంతా ఈ కార్యక్రమాన్ని విజయవంతం చేయడంలో కీలక పాత్ర పోషించారు. సునీత సింగంశెట్టి, శారద, మురళి ముద్దన, సుధాకర్ మారేం, రామ్ బిక్కుమళ్ల, కిరణ్ ఇమ్మిడిశెట్టి, పరి పత్రి, శ్రీకాంత్ గార్ల, నర్సింహ పామిడి, సోహాన దొడ్లే తదితరులు ఈ కార్యక్రమంలో పాల్గొని తమ ధ్యాన అనుభవాలను పంచుకున్నారు. ఈ  కార్యక్రమం ద్వారా చాలా మంది తెలుగువారు ధ్యానంపై ఉన్న సందేహాలను నివృత్తి చేసుకున్నారు. ఆద్యంతం ఈ కార్యక్రమం ఎంతో ఉపయుక్తంగా, ఆసక్తికరంగా సాగిందని వారు హర్షం వ్యక్తం చేశారు.

Tags :

మరిన్ని