ఎమ్మెల్యేలకు జిల్లా అధ్యక్ష పదవులుండవు

ప్రధానాంశాలు

ఎమ్మెల్యేలకు జిల్లా అధ్యక్ష పదవులుండవు

తెలంగాణ రాష్ట్ర సమితి అధిష్ఠానం నిర్ణయం
రెండేళ్లలో ఎన్నికలున్నందున నియోజకవర్గాలపైనే దృష్టి

ఈనాడు, హైదరాబాద్‌: తెలంగాణ రాష్ట్ర సమితి శాసనసభ్యులకు పార్టీ జిల్లా అధ్యక్ష పదవులు ఇవ్వరాదని అధిష్ఠానం నిర్ణయించింది. శాసనసభ ఎన్నికలకు మరో రెండేళ్ల గడువు ఉన్నందున నియోజకవర్గాల బాధ్యతలనే వారు పూర్తి స్థాయిలో నిర్వర్తించేందుకు వీలుగా, ఇతరులకు కీలక పార్టీ పదవులు ఇవ్వాలని పార్టీ అధ్యక్షుడు కేసీఆర్‌ ఉన్నట్లు తెలుస్తోంది. దాదాపు అయిదేళ్ల తర్వాత పార్టీ జిల్లా కమిటీకి ఎన్నికలు జరగనున్నాయి. మూడేళ్ల కిందట పార్టీ జిల్లా కమిటీలను రద్దు చేసి, ఎమ్మెల్యేల అధ్యక్షతన నియోజకవర్గ కమిటీలను ఏర్పాటు చేసింది. దీంతో పాటు పార్టీలో మరింతమందికి పదవులివ్వాలనే ఉద్దేశంతో జిల్లా కమిటీలను పునరుద్ధరించింది. ఈ నెల 21 నుంచి జిల్లా కమిటీల ఎన్నికలు జరగనున్నాయి. ఈ నేపథ్యంలో తెరాస కార్యనిర్వాహక అధ్యక్షుడు కేటీఆర్‌ సోమవారం పార్టీ ప్రధాన కార్యదర్శులతో నిర్వహించిన సమీక్షలో జిల్లా కమిటీల ఎన్నికల అంశం ప్రస్తావనకు రాగా.. ఎమ్మెల్యేలకు ఈ పదవులు ఇచ్చే అవకాశం లేదని వెల్లడించారు. పార్టీ ఎన్నికలను ప్రధాన కార్యదర్శులు పర్యవేక్షించనున్నారు. ఈ విషయమై వారికి ముందే  స్పష్టత ఇచ్చినట్లు తెలుస్తోంది. వాస్తవానికి మొత్తం 33 జిల్లాల్లో నలుగురైదుగురి వరకు పార్టీ జిల్లా అధ్యక్ష పదవులను ఆశించారు. అధిష్ఠానం తాజా నిర్ణయంతో వారు వెనక్కి తగ్గే వీలుంది.

సమర్థులకు పట్టం!

పార్టీ జిల్లా అధ్యక్ష పదవుల ఎంపికలో జిల్లా మంత్రులు, ఎమ్మెల్యేలు, ఎమ్మెల్సీలు, ఇతర ముఖ్యనేతలు సమన్వయంగా అభ్యర్థులను ఎంపిక చేయాలని అధిష్ఠానం నిర్దేశించింది. పార్టీకి సేవలు, సీనియారిటీ, విధేయత, ఉద్యమ నేపథ్యం తదితర అంశాలను పరిగణనలోకి తీసుకొని ఒక్కో స్థానానికి నాలుగు నుంచి అయిదుగురు అభ్యర్థుల పేర్లను ప్రతిపాదిస్తే అందులో ఒకరి పేరును పార్టీ అధ్యక్షుడు కేసీఆర్‌ ఖరారు చేయనున్నారు. హైదరాబాద్‌లో సైతం జిల్లా కమిటీనే ఎంపిక చేయాలని నిర్ణయించినందున.., ఈ పదవికి అన్ని అర్హతలను పరిగణనలోకి తీసుకోనున్నట్లు తెలిసింది. రాజధాని నేపథ్యం దృష్ట్యా అన్ని భాషలను మాట్లాడటంతో పాటు చురుకుగా వ్యవహరించే అనుభవజ్ఞులైన నేతలకు పదవి ఇవ్వనున్నట్లు తెలుస్తోంది. నగరంలో భారీఎత్తున గల ఉత్తర భారతీయ సామాజికవర్గం నాయకులకు అవకాశం ఇచ్చేందుకు వీలుగా వారి పేర్లను సైతం పరిశీలించనున్నట్లు సమాచారం.


Tags :

ప్రధానాంశాలు

జిల్లా వార్తలు

దేవతార్చన


మరిన్ని