వాష్‌ చేద్దాం.. బాస్‌లా!

జరభద్రం

సలహా

మురికిపట్టిన కారును తళతళలాడేలా శుభ్రం చేస్తే మనసుకి కలిగే ఆ సంతోషమే వేరు. చూడ్డానికది అందంగా ఉండటమే కాదు.. డ్రైవింగ్‌ చేయడానికీ సౌకర్యవంతంగా ఉంటుంది. ఆ మాటకొస్తే అమ్మితే మంచి రీసేల్‌ ధర కూడా పలుకుతుంది. అందుకే వాడే వాహనాన్ని తరచూ వాష్‌ చేస్తుండాలి. కానీ గ్యారేజీకి తీసుకెళ్తే డబ్బులు ఖర్చవుతాయని చాలామంది సొంతంగానే కారుని శుభ్రం చేస్తుంటారు. ఇది ఆచరణీయమే అయినా కొన్ని చేయాల్సిన, చేయకూడని పనులుంటాయి. అవేంటో తెలుసుకుందాం.

* కాలం గడిచేకొద్దీ కారు మురికిగా తయారవుతుంది. కీటకాలు, పక్షులు రెట్టలు వేసినప్పుడు.. దుమ్మూధూళీ బాగా పేరుకు పోయినప్పుడు కారు చూడటానికి అసహ్యంగా తయారవుతుంది. ఈ పరిస్థితి వచ్చేవరకూ ఆగొద్ధు వాషింగ్‌ని వాయిదా వేయడమే వద్ధు ఇలా చేస్తే అవి కాస్తా మొండి మరకలుగా మారి పెయింట్‌ ఊడివచ్చే అవకాశం ఉంది.

* మురికి బాగా వదులుతుందనే ఉద్దేశంతో కొందరు వేడినీటితో కారును శుభ్రం చేస్తుంటారు. ఇది మంచిది కాదు. వేడి నీటితో ఎక్కువసార్లు కడిగితే రంగు దెబ్బతింటుంది. ఆమ్ల వర్షాలు వాహనాలకు ప్రమాదకరం. ఇవి పడ్డప్పుడు వెంటనే నీటితో కడగడం మర్చిపోవద్ధు లేదంటే పెయింట్‌ పూర్తిగా దెబ్బతినడమో, రంగు పాలిపోవడమో జరుగుతుంది.

* పెద్ద బకెట్‌, పొడవాటి స్పాంజ్‌, మెత్తటి బ్రష్‌లు, శుభ్రమైన తువాలు, వాష్‌ మిట్‌, నీటిని వేగంగా చిమ్మే పంప్‌, ఆరబెట్టడానికి బ్లోయర్‌, వాక్యూమ్‌ క్లీనర్‌.. సొంతంగా కారు శుభ్రం చేయాలనుకుంటే ఇవన్నీ తప్పనిసరిగా దగ్గర ఉంచుకోవాలి. మొండి మరకలు, గీతలు తొలగించడానికి టార్‌ రిమూవల్‌, శుభ్రం చేస్తున్నప్పుడు గీతలు పడకుండా వాష్‌ మిట్‌ తప్పనిసరి.

* వాక్సింగ్‌ చేయడం వల్ల కారు ఫినిష్‌ దెబ్బతింటుందని చాలామంది భావిస్తుంటారు. ఇది అపోహే. వాక్సింగ్‌ అసలు రంగుని సంరక్షిస్తుందనీ, ఎంతో లాభదాయకమని నిపుణులు చెబుతుంటారు. చలికాలంలో, వేసవికాలం వచ్చేముందు వాక్సింగ్‌ చేయిస్తే మంచిది.

* స్పాంజ్‌, వాష్‌ మిట్‌తో శుభ్రం చేస్తున్నప్పుడు వాటిని సమాంతరంగా, పొడుగ్గా రుద్దాలి. గుండ్రంగా రుద్దితే వలయాల మరకలు ఏర్పడతాయి. కార్పెట్‌, సీట్లు, డాష్‌బోర్డులాంటి వాటిని కచ్చితంగా యూజర్‌ మాన్యువల్‌ గైడ్‌లో సూచించిన విధంగానే జాగ్రత్తగా శుభ్రం చేయాలి. సూచించిన క్లీనింగ్‌ ఉత్పత్తులనే వాడాలి.●

* సబ్బులు, డిటర్జెంట్‌లు.. ఎట్టి పరిస్థితుల్లోనూ ఉపయోగించవద్ధు వాటిలో ఉండే రసాయనాలు రంగు పైపూతను పాడు చేస్తాయి. కారు బాగా వేడెక్కినప్పుడు, ఎండలో ఉన్నప్పుడు శుభ్రం చేయొద్ధు అలా చేసినప్పుడు లిక్విడ్‌లు త్వరగా ఆరిపోయి, ఎండిపోయి కారుపై మరకలుగా మారతాయి.

* టైర్లు, చక్రాలు శుభ్రం చేసిన గుడ్డలతోనే కారు బాడీ, అద్దాలను తుడవడానికి ఉపయోగించవద్ధు వాటికి అంటుకుపోయిన సూక్ష్మ దుమ్ము రేణువులు.. కారు ఉపరితలంపై చిన్నచిన్న గీతలు పడటానికి కారణమవుతాయి. బండిని నీటితో కడగడానికి ముందే బ్రష్‌లు, వాక్యూమ్‌ క్లీనర్‌ని ఉపయోగించి దుమ్మూధూళీ శుభ్రం చేయాలి.