ఏక చక్రం.. బహు ఉపయోగం

పరిచయం

ఏక చక్రం.. బహు ఉపయోగం

కాలుష్యం ఉండదు.. ఇంధనంతో పన్లేదు... ఇంటి నుంచి ఆఫీసు.. చిన్నచిన్న అవసరాలు దేనికైనా ఓకే... అందుకే మెట్రో నగరాల్లోని కొందరు యువత విద్యుత్తు యూనిసైకిల్స్‌ బాట పడుతున్నారు.

ఏక చక్రం.. బహు ఉపయోగం

సర్కస్‌లో ఒంటి చక్రం సైకిల్‌పై సవారీ చేసే సాహసవంతులను మనం అబ్బురంగా చూస్తుంటాం. ఇప్పుడు రోడ్లపైనా అలాంటివారే అక్కడక్కడ కనిపిస్తున్నారు. అయితే వాళ్ల ఉద్దేశం ట్రాఫిక్‌, పర్యావరణ సమస్యకు చెక్‌పెట్టడం. ఈ ఏకచక్రానికి ఇంకాస్త సాంకేతికత జోడించి సరికొత్త ప్రయాణ సాధనాలుగా మలచుకుంటున్నారు. ఈ యూనిసైకిల్‌ లేదా మోనోసైకిల్‌ని బ్యాలెన్స్‌ చేయడం కష్టం అన్నది చాలామంది అభిప్రాయం. కానీ అదేమంత పెద్ద కష్టం కాదంటున్నారు చాలాకాలంగా దీన్ని ఉపయోగిస్తున్న ప్రణయ్‌ ఉపాధ్యాయ్‌. ఇది గైరోస్కోప్‌ డివైజ్‌ ఆధారంగా పనిచేస్తుంది. కొంచెం ముందుకు వంగితే ముందుకు దూసుకెళ్తుంది. నిటారుగా ఉంటే ఆగిపోతుంది. ఇరువైపులా బ్యాలెన్స్‌ చేసుకుంటే సరిపోతుంది. అన్నిరకాల రోడ్లపైనా ప్రయాణించగలగడం వీటి ప్రత్యేకత. వ్యవసాయ భూములు, అడవులు, ఎగుడుదిగుడు రోడ్లు, జాతీయ రహదారులు, బీచ్‌లలో కూడా పరుగెడతాయి. వర్షం పడ్డపుడు కూడా బాగా నడుస్తాయ్‌. వీటిని ‘స్మార్ట్‌’గానూ ఉపయోగించుకోవచ్చు. కంపానియన్‌ యాప్‌ పెట్టుకున్నామనుకోండి. వేగం, దూరం, సమయం తెలుసుకోవచ్చు. ఎంత మేర విద్యుత్‌ను వాడామన్నదీ తెలుస్తుంది. మన దగ్గర ఇప్పుడిప్పుడే వీటి వాడకం మొదలవుతోంది. బెంగళూరులో అయితే యువత ‘బైకర్స్‌’ తరహాలో ‘యూనిసైక్లర్స్‌’ బృందాలుగా ఏర్పడ్డారు. కాళ్లలో శక్తి, ఒంట్లో ఓపిక ఉన్నవాళ్లకి మామూలు సైకిళ్లలా ఒంటి చక్రం యూనిసైకిళ్లు సైతం అందుబాటులో ఉన్నాయి.

భవిష్యత్తు వీటిదే

ఏక చక్రం.. బహు ఉపయోగం

యూనిసైకిల్‌ వాడకంతో లాభాలెక్కువ. వాడకంలో పెద్దగా ఇబ్బందులుండవు. దీని బరువు పదికేజీలకు మించదు. ఎక్కడైనా ఛార్జింగ్‌ పెట్టుకోవచ్చు. ఒక్కసారి ఛార్జ్‌ చేస్తే 200 కిలోమీటర్లకుపైగా ప్రయాణం చేయొచ్చు. అత్యధిక వేగం 68కిలోమీటర్లు. ట్రాఫిక్‌ జాంలు, రోడ్ల విస్తీర్ణం తక్కువగా ఉన్నచోట తేలికగా ప్రయాణం చేయొచ్చు. వారంలో మూడు రోజులు దీన్నే వినియోగిస్తా. బాచుపల్లి నుంచి గచ్చిబౌలి ఆఫీసుకు వెళ్లిరావడానికి యూనిసైకిల్‌నే వాడుతున్నా. దీంతో ఇరవై అయిదు నిమిషాల్లో ఆఫీసుకు చేరుకోగలుగుతున్నా. అదే కారులో వెళ్తే కనీసం గంటపైనే అవుతుంది. ధర ముప్ఫైవేల రూపాయల నుంచి లక్ష రూపాయల వరకు ఉంటుంది. పర్యావరణంపై ప్రేమ ఉన్నవారు.. కాలుష్యం, ట్రాఫిక్‌ బాధలు తప్పించుకోవాలనుకునే చాలామంది వీటి వాడకానికి ఆసక్తి చూపిస్తున్నారు. భవిష్యత్తులో వీటిని వాడే వారి సంఖ్య మనం ఊహించనంతగా పెరిగిపోవడం ఖాయం.

- ప్రణయ్‌ ఉపాధ్యాయ్‌, ఐటీ ఉద్యోగి

ఎన్ని లాభాలో..

* ట్రాఫిక్‌ జాంలు ఎక్కువగా ఉండే పట్టణ, నగర రోడ్లకు చక్కని పరిష్కారం. ఆరంగుళాల స్థలం చాలు. చిన్నచిన్న సందుల్లోంచి కూడా దూసుకెళ్లిపోవచ్చు.

* బరువు తక్కువ కావడంతో ఎక్కడికైనా సులువుగా తీసుకెళ్లవచ్చు. సైకిల్‌ తొక్కగలిగే వారెవరైనా దీన్ని వాడొచ్చు.

* ఛార్జింగ్‌ ఖర్చు తప్ప ఇతర నిర్వహణ ఖర్చులు పెద్దగా ఉండవు. సెల్‌ఫోన్‌లా ఇంట్లోనే ఛార్జింగ్‌ పెట్టుకోవచ్చు.

- బెజవాడ వెంకటేశ్వర్లు

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

పరిచయం

మరిన్ని

రుచులు

App