ఏ ఇంజినాయిల్‌ వాడాలి?

మెకానిక్‌ గురూ

ఏ ఇంజినాయిల్‌ వాడాలి?

మెకానిక్‌ గురూ

ఉద్యోగరీత్యా నా భార్య రోజుకి 40 కిలోమీటర్ల వరకు ప్రయాణం చేయాల్సి ఉంటుంది. రోజూ సిటీబస్‌లో వెళ్లి రావడం కష్టంగా ఉంది. స్కూటరు కొనివ్వాలనుకుంటున్నాను. బరువు తక్కువగా ఉండి, ఎక్కువ రిపేర్లు రాకుండా ఉండే స్కూటరు సూచించండి.
- ఎం.దివాకర్‌, హైదరాబాద్‌
మీ అవసరాలకు అనుగుణంగా మార్కెట్లో చాలా కంపెనీలకు చెందిన స్కూటర్లు అందుబాటులో ఉన్నాయి. పండగలు, ప్రత్యేక సందర్భాల్లో వీటిపై అధిక రాయితీలు ఇస్తున్నారు. హోండా యాక్టివా.. పనితీరులో ముందుండి అత్యధికంగా అమ్ముడవుతోంది. టీవీఎస్‌ జూపిటర్‌.. మంచి ఫీచర్లతో అందుబాటులో ఉంది. బరువు తక్కువ ఉండాలి అనుకుంటే హోండా డియో, టీవీఎస్‌ స్కూటీ, హీరో ప్లెజర్‌ని ప్రయత్నించవచ్చు.
- ఎలక్ట్రిక్‌ కారు కొనాలనుకుంటున్నాను. బ్యాటరీ ఛార్జింగ్‌కి ఎక్కువ సమయం తీసుకున్నా, పికప్‌ తక్కువైనా ఫర్వాలేదనుకుంటున్నాను. కానీ కొందరు బ్యాటరీల ఖరీదు మొత్తం ఖరీదులో దాదాపు 40శాతం వరకు ఉంటుందనీ, బ్యాటరీలు పేలిపోయే ప్రమాదం ఉందని అంటున్నారు. వారి మాటలతో కొనాలా? వద్దా? అనే ఆలోచనలో పడిపోయాను. ఏం చేయాలి?
- సందీప్‌, కాకినాడ
ఎలక్ట్రిక్‌ వాహనాల్లో అత్యధిక ఖరీదు బ్యాటరీలదే అనేది నిజం. అయితే ఈమధ్య కాలంలో టెక్నాలజీ బాగా అభివృద్ధి చెందింది. పెద్దఎత్తున వీటిని ఉత్పత్తి చేస్తుండటంతో తయారీ ఖర్చు గణనీయంగా తగ్గుతోంది. భవిష్యత్తులో ఇంకా తగ్గే అవకాశాలున్నాయి. ఇంటర్నల్‌ కంబషన్‌ వాహనాలతో పోలిస్తే వీటిలో కదిలే విభాగాలు తక్కువ. దానికనుగుణంగానే మరమ్మతులు, నిర్వహణ ఖర్చులు తక్కువగా ఉంటాయి. పెట్రోల్‌/డీజిల్‌కయ్యే వ్యయం కన్నా ఛార్జింగ్‌ ఖర్చులు స్వల్పం. ఇంట్లోనే ఛార్జింగ్‌ చేసుకునే సదుపాయముంటుంది. నెట్‌వర్క్‌, ఛార్జింగ్‌ స్టేషన్లు పెరుగుతున్నాయి. ఎలక్ట్రిక్‌ వాహనాలకు పికప్‌ తక్కువనేది తప్పుడు ప్రచారమే. కఠిన భద్రతా పరీక్షల్లో పాసైతేనే కొత్త మోడళ్లను రోడ్లపైకి అనుమతిస్తుంది ప్రభుత్వం. బ్యాటరీలు పేలిపోతాయి, సురక్షితం కాదనే అపోహలు వద్దు.
నేను రాయల్‌ ఎన్‌ఫీల్డ్‌ 350 క్లాసిక్‌ మోడల్‌ వాడుతున్నాను. ఇందులో ఏ బ్రాండ్‌ ఇంజిన్‌ ఆయిల్‌ వాడమంటారు? కంపెనీ యూజర్‌ మాన్యువల్‌ గైడ్‌లో చెప్పినట్టు కాకుండా పొరపాటున వేరే ఆయిల్‌ వాడితే నష్టమేంటి?
- గులాం మహమ్మద్‌, నదిగూడెం
మోటార్‌సైకిళ్లలో దాని సెగ్మెంట్‌, బ్రాండ్‌ని బట్టి ఒక్కో బండికి ఒక్కోరకమైన ఇంజిన్‌ ఆయిల్‌, ఫ్లూయిడ్లు వాడమని చెబుతారు. సొసైటీ ఆఫ్‌ ఆటోమోటివ్‌ ఇంజినీర్స్‌ బైక్‌కి ఏ ఇంజిన్‌ ఆయిల్‌, బ్రేక్‌ ఆయిల్‌, కూలంట్‌.. వాడాలో నిర్ధారిస్తారు. రాయల్‌ ఎన్‌ఫీల్డ్‌ 350 క్లాసిక్‌ మోడల్‌కి ఎస్‌ఏఈ 15 డబ్ల్యు 50ఏపీఐ, ఎస్‌ఎల్‌ గ్రేడ్‌ లేదా దానికి మించిన RJASO MA2 సెమీ సింథటిక్‌ ఆయిల్‌ వాడాలి. మోతుల్‌, షెల్‌ బ్రాండ్లు ఎంచుకోవచ్చు. ఈ బండి తక్కువ కంప్రెషన్‌ రేషియోలో నడుస్తుంది కాబట్టి సెమీ సింథటిక్‌ ఆయిల్‌ వాడితే మంచిది. అన్నింటికన్నా ముఖ్యం ఐదువేల కిలోమీటర్లు లేదా ఆరునెలలకోసారి ఆయిల్‌ మార్చాలి.