close
కొర్ర సాగు సమయమిదే!

న్యూస్‌టుడే, ఆదిలాబాద్‌ (వ్యవసాయం)

వర్షభావం ఉన్న ప్రాంతాల్లో కొర్రను ఆరుతడి పద్ధతిలో ఏక పంటగా, ఇతర పంటలతో కలిపి అంతర పంటగా విత్తవచ్చని ఆదిలాబాద్‌ ఏరువాక శాస్త్రవేత్త సుధాన్ష్‌ (సెల్‌: 91778 19970) సూచించారు.
*పంటకాలం 75-80 రోజులు. సూర్యనంది, ఎ.ఐ.ఎ-3085 రకాలు ఖరీఫ్‌, వేసవి సాగుకు అనుకూలం. ఈ రకాలు అగ్గితెగులును తట్టుకుంటాయి.
* ఎకరానికి 10-12 క్వింటాళ్ల దిగుబడి వస్తుంది. వేసవి పంటగా జనవరి రెండో పక్షం వరకు విత్తాలి.
* ఎకరానికి రెండు కిలోల విత్తనం సరిపోతుంది. కిలో విత్తనానికి 3 గ్రా. థైరమ్‌ లేదా కాప్టాన్‌ కలిపి విత్తనశుద్ధి చేయాలి.
* తేలికపాటి ఎర్ర చల్కా, నల్లరేగడి, మురుగునీరు పోయే నేలలు సాగుకు అనుకూలం.
* అంతర పంటలుగా కొర్రలో కంది లేదా సోయాచిక్కుడులను 5:1 నిష్పత్తిలో విత్తుకోవచ్చు.
* విత్తే ముందు.. విత్తనానికి సన్నని ఇసుకను 1:3 నిష్పత్తిలో కలుపుకొని వరుసల మధ్య 30 సెం.మీ., మొక్కల మధ్య 10 సెం.మీ. ఎడం ఉండేలా గొర్రుతో విత్తాలి.
ఎరువులు : ఎకరాకు 3-4 టన్నుల మాగిన పశువులు ఎరువుతో పాటు 16 కిలోల యూరియా, 25 కిలోల సింగిల్‌ సూపర్‌ ఫాస్ఫేట్‌ ఎరువులను ఆఖరి దుక్కిలో వేసి కలియదున్నాలి. పంట విత్తిన 30-35 రోజుల దశలో 16 కిలోల యూరియాను పైపాటుగా వేయాలి. విత్తిన 30 రోజుల వరకు పంటలో కలుపు లేకుండా చర్యలు చేపట్టాలి.
అగ్గి తెగులు
* గాలిలో అధిక తేమ ఉండి, రాత్రి ఉష్ణోగ్రతలు 20 డిగ్రీలు ఉండే పరిస్థితులు ఈ తెగులు వ్యాప్తికి అనుకూలం.
* నత్రజనిని అధికంగా వాడే పొలాల్లో.. వర్షపు జల్లులు కురిసే వాతావరణంలో అగ్గితెగులు వ్యాప్తి ఉధృతంగా ఉంటుంది.
* ఎదిగిన మొక్కల ఆకులపై దారపు కండె ఆకారంలో మచ్చలు ఏర్పడతాయి. వీటి చుట్టూ ఎరుపు గోధుమ రంగు అంచులు ఉండి, మధ్యలో బూడిద రంగు ఉంటుంది.
* తెగులు మొక్కల కణుపుల వద్ద సోకితే మొక్క విరిగిపోతుంది.
*మొక్క వెన్ను పైకి తీసే దశలో తెగులు సోకితే వెన్ను దగ్గర నల్లటి రంగు ఏర్పడుతుంది. దీంతో తాలు గింజలు ఏర్పడుతాయి.
నివారణ : తెగులుకు కారణమయ్యే శిలీంద్రం విత్తనాలు, పంట అవశేషాలు, కలుపు మొక్కల ద్వారా వ్యాప్తి చెందుతుంది. మొక్కలపై మచ్చలు కనిపిస్తే లీటరు నీటికి.. గ్రాము కార్బండజిమ్‌ కలిపి పిచికారీ చేయాలి. నత్రజని ఎరువులను సిఫారసుకు మించి వాడొద్దు.

మరిన్ని

జిల్లా వార్తలు

దేవ‌తార్చ‌న

మరిన్ని
రుచులు