close
చేపల్లో వ్యాధులు

న్యూస్‌టుడే, ఉండి

రాష్ట్రంలో మత్స్య సంపద విస్తరిస్తోంది. 11 జిల్లాల్లో సుమారు 6.5 లక్షల ఎకరాల విస్తీర్ణంలో చేపలు, రొయ్యల పెంపకం జరుగుతోంది. ఏడాదికి రూ.45 వేల కోట్ల విలువైన విదేశీ మారక ద్రవ్యాన్ని ఈ రంగం ఆర్జించి పెడుతోంది. ఆక్వాలో వ్యాధుల కారణంగా ఏటా దాదాపు రూ.500 కోట్లకు పైబడి నష్టం వాటిల్లుతోంది. వాతావరణంలో ఉష్ణోగ్రతల్లో హెచ్చుతగ్గులు చేపల జీవ ప్రక్రియపై అధిక ప్రభావం చూపుతాయని ఉండి మత్స్య పరిశోధనా స్థానం శాస్త్రవేత్త ఎన్‌.వీరభద్రరావు (సెల్‌: 96039 38318) తెలిపారు. చెరువులో నీటి ఉష్ణోగ్రతలు 20 డిగ్రీల కన్నా తగ్గినప్పుడు వృక్ష ప్లవకాలు క్షీణిస్తాయి. చేపలు మేత తీసుకోవడం తగ్గి, వాటి పెరుగుదల క్షీణిస్తుంది. చేపలకు హానిచేసే అమోనియా, హైడ్రోజన్‌ సల్ఫైడ్‌ వాయువులు చెరువు అడుగున పేరుకుపోతాయి. ఫలితంగా చేపల్లో ఆర్గ్యులస్‌, లెర్నియా, పరాన్నజీవుల వ్యాధులు అధికంగా సోకుతాయి. అందువల్ల చెరువులో నీరు కనీసం 6 అడుగులకు పైబడే ఉండాలి. ఒకవేళ ఉష్ణోగ్రతలు తగ్గినా చెరువు పైభాగంలో ఒకటి, రెండు అడుగులకే అది పరిమితమవుతుంది.
చెరువులో వృక్ష ప్లవకాల క్షీణతను నివారించేందుకు.. ప్రతి 15 రోజులకోసారి సాయంత్రం వేళ ఎకరాకు 20-30 కిలోల రాతి సున్నం చల్లాలి. ఉదయం పూట సింగిల్‌ సూపర్‌ పాస్ఫేట్‌ 10 కిలోలు + మ్యూరేట్‌ ఆఫ్‌ పొటాష్‌ 5 కిలోలను కనీసం గంటపాటు నానబెట్టి చల్లితే వృక్ష, జంతు ఫ్లవకాల సాంద్రత సాధారణ స్థాయిలో ఉంటాయి.
చేపలకు ఉదయం 8 గంటల సమయంలో మేతలిస్తే మంచిది. ప్రతి 20 రోజులకు ఒకసారి చెరువు అడుగు భాగంలోని నీటిని ఒక అడుగు మేర తీసి, అంతమేర తాజా నీటితో నింపాలి. మేతల్లో అదనంగా ఫ్యాట్‌ ఆయిల్‌ను ఇస్తే చేపల పెరుగుదల బాగుంటుంది. 50 కిలోల మేతకు 1 మి.లీ. చొప్పున ఫిష్‌ లివర్‌ ఆయిల్‌ లేదా కాడ్‌ లివర్‌ ఆయిల్‌ లేదా షార్క్‌ లివర్‌ ఆయిల్‌ కలిపి ఇవ్వాలి.

నివారణ చర్యలు
రెడ్‌ డిసీజ్‌ (ఎర్రబడే వ్యాధి) : రోహు, కట్ల, రూప్‌చంద్‌, ఫంగస్‌ చేపలకు సోకే బ్యాక్టీరియా వ్యాధుల్లో ఇది ప్రధానమైనది. ఈ వ్యాధి ఏడాది పొడవునా కన్పిస్తుంది. శీతాకాలంలో అధికంగా వస్తుంది. చేప శరీరంలోని కొన్ని భాగాలు లేదా చేపంతా రక్తపు చెమరింపుతో ఎర్రబడటం ఈ వ్యాధి ప్రధాన లక్షణం. కొన్ని చేపల్లో కన్ను బయటకు పొడుచుకొస్తుంది. ఈ చేపలు నీటిలో గుండ్రంగా లేదా దిశ లేకుండా ఈదుతాయి. మేతలు పాక్షికంగా తింటాయి లేదా తినడం మానేస్తాయి. నీరసంగా ఉండి సులభంగా దొరుకుతాయి. రోజూ పదులు, వందల సంఖ్యలో చనిపోతాయి.
నివారణ పద్ధతులు: ఈ వ్యాధి నివారణ రెండు రకాలుగా చేపట్టవచ్చు. లీటరు నీటికి లీటరు నుంచి లీటరున్నర చొప్పున బ్రోమిన్‌, అయోడిన్‌, బికెసి, ఫార్మాలిన్‌ వంటి ఏదో ఒక సానిటైజర్‌ను కలిపి ఎండగా ఉన్నరోజు చెరువులో పిచికారి చేయాలి.

మేతలో అయితే సిప్రోఫ్లాక్సోసిన్‌, డాక్సిసైక్లిన్‌, ఎండోఫ్లాక్సోసిన్‌, క్లోరోటెట్రాసైక్లిన్‌(సిటిసి), ఓటిసి, సల్ఫా-టియంపి మందుల్లో.. ఏవైనా రెండు మందులను ఒక్కొక్కటి 10 గ్రా. చొప్పున (ఒక టన్ను చేపలకు కలిపి వేయాలి. రోహు, కట్ల రకాలకు తవుడుతో కలిపి వేయాలి. రూప్‌చంద్‌, ఫంగస్‌ చేపలకు పెల్లెట్స్‌తో పాటు కలిపి అందించాలి.

పేను వ్యాధి (ఆర్కులస్‌/ ఫిష్‌ లైస్‌) : ఈ వ్యాధి సోకిన చేప శరీరంపై పుళ్లు ఏర్పడతాయి. ఈ చేపలు జిగురును విపరీతంగా స్రవిస్తాయి. జిగురు గట్టిపడి గంజి వలె కన్పిస్తుంది. పొలుసులతో సహా చేపలు నల్లబడిపోతాయి. వీటిలో కదలికలు బాగా నెమ్మదిస్తాయి. వ్యాధి సోకిన చేపలున్న చెరువులో రాత్రివేళ ‘చట్‌ చట్‌’ అనే శబ్దం వినిపిస్తుంది. వ్యాధి సోకిన చేపలు చెరువు గట్లకు, నీటి ఉపరితలానికి దగ్గరగా ఈదుతుంటాయి. మేత తింటున్నా పెరుగుదల నిలిచిపోయి రైతు ఆర్థికంగా నష్టపోయే ప్రమాదముంది. నివారణకు.. చేప పేను వ్యాధిని నిర్ధారించిన తరువాతే చికిత్స ప్రారంభించాలి. నిపుణుల సూచనల ప్రకారం బ్యుటాక్స్‌ లేదా డెల్టామెత్రిన్‌ మూడు అడుగుల నీటి లోతుకు ఎకరాకు 100 మి.లీ. వేయాలి. లేదా బికెసి + ఫార్మాలిన్‌ ఎకరాకు ఒక లీటరు పిచికారీ చేయాలి.  
చెరువుల్లో పరాన్నజీవులు వ్యాప్తి చెందకుండా ఉండేందుకు.. కలుపు మొక్కలు, ఇతర వ్యర్థాలు (కొబ్బరి మట్టలు, బొండాలు, ప్లాస్టిక్‌ సీసాలు) లేకుండా చూడాలి.
తాటాకు తెగులు: మొప్పల కణజాలం చనిపోయి తెలుపు/పసుపు రంగు చారలు ఏర్పడతాయి. మొప్పలు ఎండిన తాటాకులా కన్పిస్తాయి. మొప్పలు తప్ప మిగతా శరీరం సాధారణంగా ఉంటుంది లేదా నలుపు రంగుకు మారుతుంది. కాలేయం, క్లోమం, గుండె, మూత్రపిండం, బీజాశయాలు, కొవ్వుల్లో కణజాలం చనిపోయి తెలుపు చుక్కలు ఏర్పడతాయి. ఈ వ్యాధి కారణంగా రోహు చేపలు ఎక్కువగా మరణిస్తాయి. వ్యాధి నివారణకు.. సల్ఫా-టియంపి + ఎండోఫ్లాక్సోసిన్‌ ఒక్కొక్కటి 10 గ్రా. చొప్పున ఒక టన్ను చేపలకు 5 రోజుల పాటు మేత ద్వారా ఇవ్వాలి.
పెద్దమొప్ప పురుగు వ్యాధి : ఒకే చెరువులో రోహు, కట్ల జాతి చేపలున్నప్పటికీ, ఈ వ్యాధి కట్లకు తీవ్రంగా సోకి వాటిలో అధిక మరణాలకు కారణమవుతుంది. వ్యాధి సోకిన చేపలు చిక్కి నల్లబడతాయి. కండ క్షీణిస్తుంది. మిగిలిన శరీరమంతా సన్నబడుతుంది. ఆక్సిజన్‌ స్థాయి తక్కువున్న చెరువుల్లో ఉదయం పూట చేపలు ఎక్కువగా చనిపోతుంటాయి. వ్యాధికి గురైన చేపలు బలహీనపడి నీటి ఉపరితలం వద్ద కదులుతాయి. ఇలాంటి చేపలను గుర్తించి, చెరువు నుంచి తీసేయాలి. లేదంటే.. వ్యాధి సోకిన చేపల నుంచి విడుదలయ్యే పరాన్నజీవి లార్వాలు ఆరోగ్యంగా ఉన్న చేపలకు వ్యాప్తి చెందుతాయి. ఈ వ్యాధి నివారణకు చికిత్స చేస్తున్న రోజుల్లో.. రైతులు మేతలు తగ్గించి కడుతుంటారు. ప్రోటీన్లు ఎక్కువుండే వేరుశనగ, పత్తి చెక్కలను తగ్గిస్తుంటారు. ఇలా చేయకూడదు. ఈ సమయంలో చేపలకు మేతను సమతులంగా అందించాలి.

నిపుణుల సూచనల ప్రకారం మేతలో టన్ను చేపలకు 10 గ్రా. అల్బెండజోల్‌ కలిపి 5 రోజులు వేయాలి.
బ్యుటాక్స్‌ లేదా డెల్టామెత్రిన్‌ మూడు అడుగుల నీటి లోతుకు ఎకరాకు 100 మి.లీ. పిచికారీ చేయాలి.
గమనిక : చెరువులో మందులు వేసే లేదా పిచికారీ చేసేరోజు చేపలకు మేత వేయకూడదు. నీటిలో కలిపే మందులను, మేతలో కలిపివేసే మందులను ఒకేరోజు వేయకూడదు. నీటిలో కలిపే మందులను ముందురోజు వేసి తర్వాత మేత మందులను వాడాలి.

మరిన్ని

జిల్లా వార్తలు

దేవ‌తార్చ‌న

మరిన్ని
రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.