మొండి బాకీగా మారనీయొద్దు..

అత్యవసరంలోనూ.. ఏదైనా ఆస్తి కొనుగోలు, ఒక లక్ష్యం కోసం రుణం తీసుకోవడం సర్వసాధారణమైన విషయం. అయితే, ఈ రుణాలకు సమయానికి వాయిదాలు చెల్లించాల్సిందే. లేకపోతే అది మీపై ఆర్థిక భారాన్ని పెంచుతుంది. అదే సమయంలో మీరు కొత్త రుణాలను తీసుకోవాలనుకున్నప్పుడు రాకుండా అడ్డుకోవచ్చు. కాబట్టి, రుణం తీసుకునేముందు.. ఆ రుణం మనకి భవిష్యత్తులో భారం కాకుండా చూసుకోవాల్సిన అవసరం ఉంటుంది. దీనికోసం అప్పు తీసుకునేముందు గమనించాల్సిన కొన్ని విషయాలేమిటన్నది చూద్దాం...

నిబంధనలు తెలుసుకోండి..

రుణానికి సంబంధించిన కీలక విషయాలన్నీ రుణ దరఖాస్తు పత్రంలో పొందుపరుస్తారు. కానీ, చాలామంది వాటిని చూడకుండానే సంతకం చేస్తుంటారు. ఇది అంత మంచిది కాదు. కొన్నిసార్లు ఇది ఖరీదైన పొరపాటుగా మారే అవకాశం ఉంది. ముందస్తు చెల్లింపుపై రుసుములు, వడ్డీ రేట్ల మార్పులు, ఇతర కీలకమైన విషయాలన్నీ మనం చూడకుండానే సంతకాలు చేస్తుంటాం. కాబట్టి, సంతకాలు పెట్టేటప్పుడు కనీసం ఒకసారి వాటిని చదివేందుకు ప్రయత్నించండి.

బేరమాడండి...

ఒక రుణం తీసుకోవాలని అనుకున్నప్పుడు ముందుగా మార్కెట్లో అందుబాటులో ఉన్న వడ్డీ రేట్ల గురించి తెలుసుకోండి. మీ అర్హతను బట్టి, అందులో ఏ వడ్డీ రేటుకు రుణం రావచ్చనేది గమనించండి. గృహరుణం, వాహన, విద్యా రుణాల్లాంటి పెద్ద అప్పులకు వడ్డీలో స్వల్ప శాతం తగ్గినా ప్రభావం అధికంగానే ఉంటుంది. వడ్డీ రేటుతో పాటు బ్యాంకులు, ఆర్థిక సంస్థలు ప్రాసెసింగ్‌ ఫీజు, డాక్యుమెంటేషన్‌ ఫీజులాంటి ఇతర రుసుములనూ విధిస్తాయి. ఇవన్నీ అంతిమంగా మీ రుణ భారాన్ని పెంచేవే. కాబట్టి, రుణం తీసుకోబోయే ముందు రుణదాతతో వడ్డీ, ఇతర రుసుములకు సంబంధించిన అంశాలపై బేరమాడండి. దీనివల్ల మీకు భవిష్యత్తులో ఈఎంఐ భారం తగ్గుతుంది. రూపాయి ఆదా చేసినా.. రూపాయి సంపాదించినట్లే అని మర్చిపోకండి.

సమయానికి చెల్లింపు..

అందరికీ రకరకాల ఆర్థిక బాధ్యతలు ఉంటాయి. కొన్నిసార్లు వీటన్నింటికీ డబ్బును సమకూర్చాల్సిన పరిస్థితి. ఇతర అత్యవసర ఖర్చులు లేనప్పుడు రుణాన్ని తీర్చేందుకే మొదటి ప్రాధాన్యం ఇవ్వాలి. అధిక వడ్డీ ఉండే.. వ్యక్తిగత రుణాలు, క్రెడిట్‌ కార్డు బిల్లులను సకాలంలో చెల్లించకపోతే.. వాటిపైన అపరాధ రుసుము అధికంగా ఉంటుంది. చక్రవడ్డీ ప్రభావం వల్ల వడ్డీ భారమూ పెరుగుతుంది. ఒకసారి వాయిదాలను వాయిదా వేస్తూ వెళ్తే.. భవిష్యత్తులో వాటిని తీర్చడం మరింత కష్టం అవుతుంది. కాబట్టి, అప్పులను తీర్చడంలో క్రమశిక్షణ చాలా అవసరం. లేకుంటే తీసుకున్న చిన్న రుణమే మెండి బాకీగా మారి, మీకు భారంగా మారుతుంది.

అధికంగా వద్దు..

చాలామంది తమకు కావాల్సిన మొత్తం కన్నా అధికంగా రుణం కోసం దరఖాస్తు చేస్తుంటారు. తీరా రుణం మంజూరై.. అంత మొత్తానికి వాయిదాలు చెల్లించలేమని తెలిసినప్పుడు ఇబ్బంది ఎదుర్కొంటారు. అంతేకాకుండా వాయిదాలు చెల్లించకపోతే పారు బాకీగా మారిపోతుంది. కాబట్టి, మీకు రుణం ఎంత అవసరం? ఎంత మేరకు తీర్చగలరు అనేది చూసుకున్నాకే నిర్ణయం తీసుకోండి. కీలకమైన ఇతర ఆర్థిక బాధ్యతలనూ చూసుకోండి. కనీసం ఆరు నెలల ఈఎంఐలను చెల్లించేందుకు అవసరమైన అత్యవసర నిధి ఎప్పుడూ మీ దగ్గర అందుబాటులో ఉండాలనే సూత్రాన్ని విస్మరించకండి.

కొత్త రుణాలతో..

ఇప్పటికే మీరు గృహరుణంలాంటివి తీసుకొని ఉంటే.. కొత్తగా మరో పెద్ద అప్పును తీసుకోవడం అంత మంచిది కాదు. మీకు అర్హత ఉంది కదా అని రుణం తీసుకుంటే.. దాన్ని తిరిగి తీర్చడానికి మీకు కష్టం కావచ్చు. కొత్తగా రుణం తీసుకోవాలనుకున్నప్పుడు.. ఈ వాయిదాల భారం ఇప్పటికే మీకున్న ఆర్థిక పరిస్థితిపై ఎలాంటి ప్రభావం చూపిస్తుందనే అంచనా వేసుకోవాలి. నిజానికి మీ మొత్తం ఆదాయంలో 40శాతానికి మించి ఈఎంఐలు ఉండకూడదు. మీ ఆదాయం పెరిగిందని కొత్త రుణం తీసుకోవాలని అనుకున్నప్పుడు.. రెండు విషయాలు గమనించాలి. మీరు తీసుకునే రుణాన్ని ఎందుకు ఉపయోగిస్తారు? పెరిగిన ఆదాయంతో పాత రుణాన్ని ముందే తీర్చేస్తే ఎంత లాభం? ఈ విషయాలను గమనించిన తర్వాతే.. మరో అప్పు చేయాలి. మరీ అవసరం అయితే, మీకు ఇబ్బంది లేని చిన్న రుణాలను తీసుకోవడం మేలు.

- అధిల్‌ శెట్టి, సీఈఓ, www.Bazaar.com

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App