ఖర్చు తగ్గాలి.. పొదుపు పెరగాలి...

ఆర్థిక ప్రణాళిక

ఖర్చు తగ్గాలి.. పొదుపు పెరగాలి...

భారత దేశం మొత్తం లాక్‌డౌన్‌ అయిపోయింది. స్టాక్‌ మార్కెట్లలోనూ ఏం జరుగుతుందో అర్థం కాని పరిస్థితి. ఈ సమయంలో చాలామంది తమ పెట్టుబడులను ఆపేయాలనేలాంటి నిర్ణయాలు తీసుకుంటున్నారు. ఒక సమస్యకు ఆందోళన చెందడం ఎప్పుడూ పరిష్కారం కాదు.. ఆర్థిక విషయాల్లోనూ అంతే. ఇప్పుడు తీసుకునే భావోద్వేగ నిర్ణయం..మీ భవిష్యత్తును ప్రభావితం చేస్తుంది.. ఈ కష్టకాలంలో మనం ఎలా ప్రణాళిక వేసుకోవాలన్నది చూద్దాం..
అత్యవసర నిధి ఉందా?
ప్రస్తుత పరిస్థితుల్లో తగినంత అత్యవసర నిధి ఉండటం అత్యంత అవసరం. ఇక్కడ ‘తగినంత’ అనేది వ్యక్తులు, వారి అవసరాలను బట్టి మారుతుంది. అయితే, కనీసం 6 నెలల ఖర్చులకు సరిపడా మొత్తం మీ దగ్గర ఉండాలన్నది ప్రాథమిక సూత్రం. మీకు అందుబాటులో ఉన్న నిధులను బట్టి, దీన్ని ఇంకా పెంచుకోవచ్చు. ప్రస్తుతం ఉన్న పరిస్థితులను ఒకసారి పరిశీలిస్తే.. అత్యవసర నిధి అవసరం ఎంతన్నది మనకే అర్థం అవుతుంది. ఉద్యోగం కోల్పోవడం, ఆరోగ్య అత్యవసరం లేదా ఇతర రకాలైన ఆర్థిక అవసరాలకు డబ్బు కావాలంటే.. అప్పు చేయడం మినహా గత్యంతరం ఉండదు. ఇలాంటి పరిస్థితి రాకుండా చూసుకోవాలి. వేర్వేరు చోట ఉన్న డబ్బునంతా ఒకేచోట అందుబాటులో ఉండేలా పెట్టుకోండి. దీనికోసం బ్యాంకు పొదుపు ఖాతా, ఫిక్స్‌డ్‌ డిపాజిట్‌ లాంటివి ఎంచుకోండి.
బడ్జెట్‌ పాటించండి..
ఖర్చులను నియంత్రించడం ఇప్పుడు మనముందున్న ప్రధాన లక్ష్యం. అత్యవసర నిధిని వాడుకోకుండా ఉండాలంటే.. కచ్చితంగా అనవసర వ్యయాలను కట్టడి చేయాల్సిందే. ఇప్పటికీ మీరు దీని గురించి ఆలోచించకపోతే... ఇకనైనా ఆలస్యం చేయొద్దు. ముందుగా మీరు ఈ లాక్‌డౌన్‌ సమయంలో ఏయే ఖర్చులు ఉన్నాయన్న విషయానికి సంబంధించి ఒక బడ్జెట్‌ వేసుకోండి. అత్యవసరాలైన ఇంటి అద్దె, నిత్యావసరాలు, విద్యుత్‌, నీటి బిల్లులు, దినపత్రికలు తదితరాల వాటిపైనే మాత్రమే ఖర్చు చేయాలి. పెద్ద మొత్తంలో వ్యయం అయ్యే, అంతగా అనవసరమైన వాటి కొనుగోలుకు ఇప్పుడు ప్రాధాన్యం ఇవ్వకూడదు. పరిస్థితులన్నీ సాధారణ స్థితికి చేరుకున్నాకే దీని గురించి ఆలోచించాలి. ప్రస్తుతం రోజువారీ ప్రయాణ ఖర్చులు, బయట తినడంలాంటివి తగ్గిపోయాయి. కాబట్టి, ఆ మిగులును మనం జాగ్రత్తగా పొదుపు చేసుకొని, మున్ముందు అవసరాలకు వాడుకోవాలి.
‘సిప్‌’ ఆపొద్దు..
ప్రస్తుతం చాలా మ్యూచువల్‌ ఫండ్ల ఎన్‌ఏవీ భారీగా తగ్గిపోయింది. మీరు మదుపు చేసినప్పుడు మంచి పనితీరుతో ఉన్న ఫండ్లను, దీర్ఘకాలిక లక్ష్య సాధనకు ఉపయోగపడతాయని ఎంచుకున్నారు. క్రమానుగత పెట్టుబడి విధానం (సిప్‌) మార్కెట్లో దశల వారీగా మదుపు చేసేందుకు, రూపాయి సగటు ప్రయోజనం పొందేందుకు వీలు కల్పిస్తుంది. ఇప్పటికే మీరు మార్కెట్లో సిప్‌ కొనసాగిస్తూ ఉంటే.. దాన్ని ఆపే ప్రయత్నం చేయొద్దు. ఫండ్‌ ఎన్‌ఏవీ తగ్గితే మీకు మరిన్ని యూనిట్లు లభిస్తాయి. భావోద్వేగంతో పెట్టుబడిని వెనక్కి తీసుకుంటే.. భవిష్యత్తులో వృద్ధి అవకాశాన్ని కోల్పోతాం అని గుర్తుంచుకోండి.

- అధిల్‌ శెట్టి, సీఈఓ, BankBazaar.com

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

ఆర్థిక ప్రణాళిక

మరిన్ని

రుచులు

App