ఆర్థిక ప్రణాళిక

ధీమాగా అధిక రాబడి...

బ్యాంకు, పోస్టాఫీసు డిపాజిట్లపై వడ్డీ రేట్లు ప్రస్తుతం కనిష్ఠ స్థాయిలో ఉన్నాయి. సురక్షితంగా ఉంటూ.. రాబడి హామీతో ఉన్న పథకాలు కావడంతో చాలామంది వీటినే నమ్ముకుంటున్నారు. భారత ప్రభుత్వ హామీ ఉన్న పోస్టల్‌ లైఫ్‌ ఇన్సూరెన్స్‌ (పీఎల్‌ఐ) ఎండోమెంట్‌ పాలసీలు ఇప్పుడు వీటికి ప్రత్యామ్నాయంగా కనిపిస్తున్నాయి. బీమాతో పాటు అధిక రాబడి రావాలని కోరుకునే వారు వీటిని పరిశీలించవచ్చు.

పోస్టాఫీసు పోస్టల్‌ లైఫ్‌ ఎండోమెంట్‌ అస్యూరెన్స్‌ రూ.10లక్షల పాలసీకి వివిధ వ్యవధుల్లో చెల్లించాల్సిన ప్రీమియం.. రాబడి ఎలా ఉంటుంది? మిగతా పథకాలతో పోలిస్తే ఎంత ప్రయోజనమో.. చూద్దాం.
5 ఏళ్ల వ్యవధికి...
ఐదేళ్ల వ్యవధికి రూ.10లక్షల విలువైన ఎండోమెంట్‌ అస్యూరెన్స్‌ పాలసీ తీసుకుంటే మొదటి ఏడాదిలో నెలకు రూ.17,974, రెండో ఏడాది నుంచి నెలకు రూ.17,587 ప్రీమియం చెల్లించాలి. ప్రస్తుతం ఈ పాలసీకి పీఎల్‌ఐ రూ.వేయికి రూ.52 రూపాయలు బోనస్‌ ఇస్తోంది. దీని ప్రకారం ఐదేళ్ల తర్వాత రూ.12,60,000 మెచ్యూరిటీ మొత్తం లభిస్తుంది. బ్యాంకులో వడ్డీ లెక్కించిన విధంగా మూడు నెలల చక్రవడ్డీ లెక్కిస్తే ఇది 6.65శాతం చక్రవడ్డీకి సమానం. పోస్టాఫీసు రికరింగ్‌ డిపాజిట్‌లో ఇదే మొత్తాన్ని చెల్లిస్తే 5.8శాతం వడ్డీతో ఐదేళ్ల తర్వాత రూ.12,31,807 వస్తాయి. అంటే, పోస్టల్‌ రికరింగ్‌ డిపాజిట్‌లో బదులు పోస్టల్‌ లైఫ్‌ ఇన్సూరెన్స్‌లో కడితే రూ.27,943 అదనంగా లభిస్తాయన్నమాట. బ్యాంకు డిపాజిట్లను రద్దు చేసుకొని, అత్యవసర నిధిగా వాడుకోవచ్చు. పీఎల్‌ఐలో ఆ వెసులుబాటు ఉండదు.
10 ఏళ్ల పాలసీ తీసుకుంటే..
మొదటి ఏడాది నెలకు రూ.8,778, రెండో ఏడాది నుంచి నెలకు రూ.8,559 ప్రీమియం ఉంటుంది. పదేళ్ల తర్వాత మెచ్యూరిటీ మొత్తం రూ.15,20,000 లభిస్తుంది. ఇది 7.29శాతం మూడు నెలల చక్రవడ్డీకి సమానం. ఇదే మొత్తాన్ని బ్యాంకు రికరింగ్‌ డిపాజిట్‌లో పెడితే.. 5.4శాతం వడ్డీతో పదేళ్లకు రూ.13,71,085 వస్తాయి. అంటే బ్యాంకులో ఆర్‌డీ చేయడానికి బదులు పీఎల్‌ఐలో కట్టడం రూ.1,48,506 అదనంగా లభిస్తాయన్నమాట. పీఎల్‌ఐలో బోనస్‌ మారవచ్చు. కానీ బ్యాంకు డిపాజిట్‌ చేసిన రోజు ఉన్న వడ్డీ రేటు భవిష్యత్తులో మారదు.
15 ఏళ్లకు..
రూ.10లక్షల పాలసీకి తొలి 12 నెలలపాటు రూ.5,852 చెల్లించాలి. ఆ తర్వాత నుంచి నెలకు రూ.5,726 ప్రీమియం వర్తిస్తుంది. 15 ఏళ్ల తర్వాత రూ.17,80,000 మెచ్యూరిటీ లభిస్తుంది. ఇది 6.72 శాతం మూడు నెలల చక్రవడ్డీకి సమానం. ఇదే మొత్తాన్ని పబ్లిక్‌ ప్రావిడెంట్‌ ఫండ్‌లో కడితే 7.1శాతం వార్షిక చక్రవడ్డీతో పదిహేనేళ్లకు రూ.18,10,0043 వస్తాయి. అంటే, పీఎల్‌ఐతో పోలిస్తే పీపీఎఫ్‌లో 15 ఏళ్లలో రూ.30,043 అదనంగా లభిస్తాయన్నమాట. కానీ, పీపీఎఫ్‌లో జీవిత బీమా ఉండదు. పీఎల్‌ఐ, పీపీఎఫ్‌ రెండింటిలో రాబడికి హామీ లేదు. కానీ, రెండింటిలో కట్టే మొత్తంపై ఏడాదికి రూ.1,50,000 వరకూ ఆదాయపు పన్ను రాయితీ లభిస్తుంది.
20 ఏళ్ల వ్యవధి ఉంటే..
మొదటి ఏడాది నెలకు రూ.4,180, ఆ తర్వాత నుంచి నెలకు రూ.4,090 చెల్లించాల్సి ఉంటుంది. 20 ఏళ్ల తర్వాత రూ.20,40,000 మెచ్యూరిటీ మొత్తం లభిస్తుంది. ఇది 6.62శాతం మూడు నెలల చక్ర వడ్డీకి సమానం.
25 ఏళ్లకు
పదవీ విరమణలాంటి దీర్ఘకాలిక లక్ష్యాలను దృష్టిలో పెట్టుకొని పొదుపు చేయాలనుకున్నప్పుడూ ఈ పాలసీని పరిశీలించవచ్చు. ఇందులో 25 ఏళ్ల వ్యవధికి రూ.10లక్షల పాలసీ తీసుకుంటే.. మొదటి ఏడాదిలో నెలకు రూ.3,344, రెండో ఏడాది నుంచి నెలకు రూ.3,272 చెల్లించాలి. 25 ఏళ్ల తర్వాత రూ.23లక్షలు అందుకోవచ్చు. ఇది 6.07శాతం మూడు నెలల చక్రవడ్డీకి సమానం.
ఇక 30 ఏళ్ల వ్యవధిని ఎంచుకున్న వారికి తొలి ఏడాదిలో నెలకు రూ.2,717, రెండో ఏడాది నుంచి నెలకు రూ.2,650.50 చెల్లించాలి. వ్యవధి తీరిన తర్వాత రూ.25,60,000 లభిస్తాయి. ఇది 5.78శాతం చక్రవడ్డీకి సమానమైన రాబడి.
పోస్టాఫీసు జీవిత బీమా పాలసీలను సురక్షితమైన రాబడిని ఆశించేవారు ఎంచుకోవచ్చు. కానీ, బీమా అవసరాలకు దీనిపైనే ఆధారపడటం అంత మంచిది కాదు. వార్షికాదాయానికి కనీసం 10-15 రెట్ల వరకూ జీవిత బీమా టర్మ్‌ పాలసీ ద్వారా తీసుకోవడమే మేలు.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి కథామృతం రుచులు దేవతార్చన

ఆర్థిక ప్రణాళిక

మరిన్ని

రుచులు

App