పెట్టుబడి విలువ పడిపోతుంటే..

షేర్లు - ఫండ్లు

పెట్టుబడి విలువ పడిపోతుంటే..

భారతీయ స్టాక్‌ మార్కెట్‌లో అనిశ్చితి ఏర్పడింది. ఏడాది క్రితం ఎన్‌బీఎఫ్‌సీల సంక్షోభం ఏర్పడింది. కొన్ని సంస్థలు తాము తీసుకున్న రుణాలను తిరిగి చెల్లించడంలో విఫలం అయ్యాయి. దీనివల్ల వాటి కార్పొరేట్‌ పత్రాల రేటింగులు తగ్గిపోయాయి. ఈ ఎన్‌బీఎఫ్‌సీలు, రుణ పత్రాల్లో పెట్టుబడి పెట్టిన పలు మ్యూచువల్‌ ఫండ్‌ సంస్థల పథకాలు దీనివల్ల కొంత ప్రతికూల ప్రభావాన్ని ఎదుర్కొన్నాయి. కొన్ని ఫండ్ల ఎన్‌ఏవీలు గణనీయంగా పడిపోయాయి. ఇవే కాకుండా.. పనితీరు బాగాలేని కొన్ని ఫండ్లు సరైన రాబడిని అందించలేకపోయాయి. ఈ నేపథ్యంలో ఫండ్‌ ఎన్‌ఏవీలు తగ్గుతుంటే ఎలాంటి జాగ్రత్తలు తీసుకోవాలి? తెలుసుకుందాం!

‘మ్యూచువల్‌ ఫండ్లు మార్కెట్‌ ఆధారంగా పనిచేస్తాయి..’ ఈ హెచ్చరిక ప్రతి ఫండ్‌ పథకం గురించి వింటూనే ఉంటాం. ఒక్క మ్యూచువల్‌ ఫండ్లే కాదు.. స్టాక్‌ మార్కెట్‌తో సంబంధం ఉన్న ఏ పెట్టుబడికైనా ఇదే నిబంధన వర్తిస్తుంది. నష్టభయం ఉన్న చోటే రాబడి అధికంగా వస్తుంది. సాధ్యమైనంత వరకూ నష్టాన్ని తగ్గించుకుంటూ.. లాభాలను పెంచుకోవాలి. కారణాలేమైనా సరే.. మీ మ్యూచువల్‌ ఫండ్లపై వచ్చే రాబడి తగ్గినా.. లేదా రుణాత్మకంగా వచ్చినా.. ఏం చేయాలనేది ఇక్కడ కీలకం.

సరైన పథకమేనా?
మ్యూచువల్‌ ఫండ్లలో మదుపు చేసేప్పుడు మనం తీసుకోవాల్సిన మొదటి జాగ్రత్త ఫండ్‌ ఎంపికలోనే తీసుకోవాలి. ఏ ఫండ్‌లో మదుపు చేయాలన్నది సరిగా చూసుకోకుండా మదుపు చేసి, చాలామంది పొరపాటు చేస్తుంటారు. ఫండ్‌ గత చరిత్రను పరిగణనలోనికి తీసుకొని, ఆయా ఫండ్లను ఎంచుకోవడం సాధారణంగా పాటించే విషయం. కానీ, ఇక్కడ గుర్తుపెట్టుకోవాల్సిన విషయం ఏమిటంటే.. గత పనితీరు భవిష్యత్తులోనూ కొనసాగుతుందనేదానికి ఎలాంటి హామీ ఉండదు. ఫండ్ల ఎంపికలో పాటించే మరో విధానం రేటింగులను చూడటం. ఇదీ సరైన పద్ధతి కాదు. రేటింగులకు బదులు వ్యక్తిగతంగా నష్టభయం భరించే సామర్థ్యం ఎలా ఉంటుందన్నది చూడాలి. కొన్నిసార్లు టాప్‌ రేటింగ్‌ ఉన్న ఫండ్లను ఎంచుకునేందుకు ప్రయత్నిస్తుంటారు. ఇవన్నీ కూడా ఫండ్‌ ఎంపికలో కొంత సహాయం చేస్తాయి.. కానీ, పూర్తిగా వీటి మీదే ఆధారపడకూడదు. పెట్టుబడి పెట్టబోయే ఫండ్‌ పనితీరును అర్థం చేసుకోవాలి. దాని లక్ష్యం, వ్యూహం ఏమిటో తెలుసుకోవాలి. నష్టభయం వచ్చే అవకాశం ఎంతుంది? అందులో ఎంత వ్యవధి కొనసాగితే మేలు.. ఇలా అన్ని వివరాలను పరిశీలించాలి. ఇదే విభాగంలో ఉన్న ఇతర పథకాలతో పోలిస్తే.. ఇది ఎందుకు మేలన్నది అర్థం చేసుకునేందుకు ప్రయత్నించాలి.

సమీక్షించుకోండి..
మ్యూచువల్‌ ఫండ్లలో మంచి రాబడి రావాలంటే.. వాటి పనితీరును ఎప్పటికప్పుడు సమీక్షించుకుంటూ అవసరమైన మార్పులు చేర్పులు చేసుకోవాలి. అయితే, ఇది రోజువారీ ప్రక్రియ కాకూడదు. ఒక నిర్ణీత కాలాన్ని పెట్టుకొని, వాటిని పరిశీలించాలి. విశ్లేషణలో తేలిన అంశాల ఆధారంగా వేటిని వదిలించుకోవాలి.. వేటిని అట్టిపెట్టుకోవాలి అనేది తెలిసిపోతుంది. క్రమం తప్పకుండా సమీక్షించుకున్నప్పుడే నాణ్యమైన పోర్ట్‌ఫోలియోను సృష్టించుకోగలం.

ఇప్పటికే ఉంటే...
మీరు ఇప్పటికే మదుపు చేసిన మ్యూచువల్‌ ఫండ్‌ పథకాలు.. ప్రతికూల రాబడులు ఇస్తే.. ఏం చేయాలి? అనే సందేహం ఉందా?.. ముందుగా మీరు ఎంచుకున్న ఫండ్‌ పథకాలు సరైనవేనా అనేది సమీక్షించుకోండి. మీరు పథకాల ఎంపికలో పొరపాటు చేస్తే.. దాన్ని దిద్దుకోండి. వాటిల్లో సిప్‌ చేస్తుంటే.. వెంటనే ఆ సిప్‌ను ఆపేయండి. ఆ సిప్‌ను మంచి పనితీరు ఉన్న ఫండ్‌కు మళ్లించండి. కొత్త పథకం ఎంపికలో కనీస జాగ్రత్తలు పాటించండి. పాత ఫండ్‌లో నుంచి పెట్టుబడులను వెనక్కి తీసుకునేందుకు సరైన సమయమేనా చూసుకోండి. ఎన్‌ఏవీ మరీ తక్కువగా ఉంటే.. కొన్నాళ్లు వేచి చూస్తే లాభం ఉంటుందా చూసుకోవాలి. అవసరాన్ని బట్టి నిపుణుల సలహాలు పాటించాలి. కొన్నిసార్లు తాత్కాలిక కారణాల వల్ల ఫండ్‌ పనితీరు కొంత దెబ్బతినవచ్చు. ఇలాంటప్పుడు ఆందోళన చెందకుండా.. అది మళ్లీ గాడిన పడేదాకా వేచి చూడటమే మేలు.

వైవిధ్యమే మేలు..

సరైన ఫండ్‌ను ఎంపిక చేసుకుంటేనే సరిపోదు. అది ఎంత వరకూ వైవిధ్యంగా ఉందన్నదీ ముఖ్యమే. ఉదాహరణకు మీరు ఐదు మంచి లార్జ్‌ క్యాప్‌ ఫండ్లను ఎంచుకున్నారనుకుందాం.. అయినప్పటికీ.. మీరు నష్టపోవచ్చు. అదెలా అనే కదా మీ అనుమానం.. ఒకే పెట్టుబడి వ్యూహానికి పరిమితమైన ఫండ్లలోనే మదుపు చేయడం ఇక్కడ పొరపాటు. ఐదు ఫండ్లలో మదుపు చేయాలనుకున్నప్పుడు అవి వైవిధ్యంగా ఉండేలా చూసుకున్నప్పుడే నష్టభయం పరిమితం అవుతుంది. ఒక ఫండ్‌ పనితీరు సరిగా లేకపోయినా.. మరో ఫండ్‌ ఆ నష్టాన్ని భర్తీ చేసే అవకాశం ఉంటుంది. ప్రస్తుతం ఉన్న పరిస్థితినే విశ్లేషిస్తే.. డెట్‌ ఫండ్లలోనే మొత్తం పెట్టుబడి పెట్టారనుకుందాం.. ఏమిటి పరిస్థితి? అందుకే, ఎప్పుడూ పెట్టుబడుల్లో వైవిధ్యం ఉండాలని చెప్పేది.. అన్ని రకాల పెట్టుబడి వ్యూహాలతో పనిచేసే ఫండ్లను ఎంపిక చేసుకోవడం ద్వారా నష్టభయాన్ని తగ్గించుకుంటూ.. రాబడిని పెంచుకోవచ్చు.

- నితిన్‌ వ్యాకరణం, సీఈఓ, www.Arthayantra.com

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

షేర్లు - ఫండ్లు

మరిన్ని

రుచులు

App