స్టాండ్స్‌లో ఓ ప్రేమ కథ

రెండో వన్డేలో ఓ వైపు కష్టాల్లో ఉన్న జట్టును కాపాడేందుకు కోహ్లి, శ్రేయస్‌ బ్యాటింగ్‌ చేస్తుంటే.. మరోవైపు స్టేడియంలోని అభిమానుల స్టాండ్స్‌లో ప్రేమ గాలి వీచింది. ఓ భారత అబ్బాయి.. తనను పెళ్లి చేసుకోమని ఆస్ట్రేలియా అమ్మాయిని కోరడం.. దానికి ఆమె ఒప్పుకోవడం క్షణాల్లో జరిగిపోయింది. మోకాళ్లపై కూర్చొని చేతిలోని ఉంగరాన్ని ఆమెకు చూపి.. అతను పెళ్లి ప్రస్తావన తేవడంతో ఆ అమ్మాయి ఆశ్చర్యంలో మునిగిపోయింది. ఆ వెంటనే తేరుకుని సరేనని చెప్పింది. ఈ తతంగాన్నంతా అక్కడున్న కెమెరా బంధించింది. అప్పుడు వ్యాఖ్యాతలుగా ఉన్న షేన్‌వార్న్‌, మెక్‌గ్రాత్‌ కూడా ఆ అమ్మాయి ఏం చెబుతుందోనని ఆసక్తిగా చూశారు. ఆమె ఒప్పుకున్న తర్వాత.. ‘‘ఆమె సరే అంది’’ అని స్టేడియంలోని తెరపై ప్రదర్శించారు. ఆ జంటను మ్యాక్స్‌వెల్‌ చప్పట్లతో అభినందించాడు.