సిరీస్‌ ఫలం సిరాజ్‌

దిల్లీ: ఆస్ట్రేలియాతో టెస్టు సిరీస్‌లో పేసర్‌ మహ్మద్‌ సిరాజ్‌ టీమ్‌ఇండియాకు దక్కిన ఫలితమని చీఫ్‌ కోచ్‌ రవిశాస్త్రి అభిప్రాయపడ్డాడు. చరిత్రాత్మక టెస్టు సిరీస్‌ విజయంలో కీలకపాత్ర పోషించిన సిరాజ్‌పై రవిశాస్త్రి ప్రశంసల వర్షం కురిపించాడు. ‘‘తన బౌలింగ్‌ దాడితో అదరగొట్టిన సిరాజ్‌ ఆసీస్‌ పర్యటన ద్వారా దక్కిన ఫలితం. వ్యక్తిగత బాధను అధిగమించి జాతి వివక్షకు వ్యతిరేకంగా పోరాడాడు. అడ్డంకుల్ని అనుకూలంగా మలుచుకున్నాడు’’ అని రవిశాస్త్రి కితాబిచ్చాడు. ఆసీస్‌ సిరీస్‌లో దొరికిన అవకాశాన్ని గొప్పగా సద్వినియోగం చేసుకున్న సిరాజ్‌ 13 వికెట్లు తీసి అత్యధిక వికెట్లు పడగొట్టిన భారత బౌలర్‌గా నిలిచాడు.  చివరిదైన నాలుగో టెస్టులో ఆసీస్‌ రెండో ఇన్నింగ్స్‌లో అయిదు వికెట్లు తీసి జట్టు విజయంలో తన వంతు పాత్ర పోషించాడు.