జాతీయ టీటీ ఛాంప్‌ సత్యన్‌

స్నేహిత్‌కు కాంస్యం

పంచకుల: భారత టీటీ స్టార్‌ సత్యన్‌ సుదీర్ఘ నిరీక్షణకు తెరపడింది. అతడు తొలిసారి జాతీయ టేబుల్‌ టెన్నిస్‌ ఛాంపియన్‌షిప్‌ సొంతం చేసుకున్నాడు. మంగళవారం ఫైనల్లో సత్యన్‌ 4-2 (11-6, 11-7,   10-12, 7-11, 11-8, 11-8)తో తొమ్మిదిసార్లు ఛాంపియన్‌ శరత్‌ కమల్‌పై నెగ్గి టైటిల్‌ కైవసం చేసుకున్నాడు. అంతకుముందు సెమీఫైనల్లో సత్యన్‌ తెలంగాణ కుర్రాడు ఫిదెల్‌ ఆర్‌.స్నేహిత్‌ జోరుకు బ్రేకులు వేశాడు. సెమీస్‌ చేరి పతకం ఖాయం చేసుకున్న స్నేహిత్‌ కాంస్యంతో సరిపెట్టుకోవాల్సి వచ్చింది. స్నేహిత్‌ 0-4 (11-13, 5-11, 9-11, 5-11)తో సత్యన్‌ చేతిలో ఓడాడు. మరో సెమీస్‌లో శరత్‌ కమల్‌ 4-2 (11-8, 5-11, 14-12, 11-9, 9-11, 17-15) మానవ్‌ ఠక్కర్‌పై గెలిచాడు. ఇంతకుముందు 2014, 2015లో సత్యన్‌ ఫైనల్లో ఓడిపోయాడు.