ఈనాడు, హైదరాబాద్‌: కాచిగూడ వద్ద జరిగిన రైలు ప్రమాదంలో గాయపడి ఆసుపత్రిలో చికిత్స పొందుతున్న లోకోపైలట్‌ చంద్రశేఖర్‌ ఆరోగ్య పరిస్థితి గురువారం నాటికి మరింత విషమంగా మారింది. కుడి కాలులోని రక్తనాళాలు పూర్తిగా దెబ్బతినడంతో రక్త ప్రసరణ నిలిచిపోయింది. వాస్క్యులర్‌ సర్జరీ నిపుణులు పరిశీలించి రక్త ప్రసరణ పునరుద్ధరించేందుకు ప్రయత్నించినా ఫలితం కనిపించలేదు. ఇన్‌ఫెక్షన్‌ శరీరం మొత్తం వ్యాపించే ప్రమాదం ఉండటంతో మరో దారి లేక శస్త్రచికిత్స చేసి కుడి కాలును మోకాలు వరకు తొలగించినట్లు వైద్యులు తెలిపారు.