ఆయుధాల రిజిస్టర్‌ను చూశారా? ఐసీయూ అంటే తెలుసా?

ప్రధానాంశాలు

ఆయుధాల రిజిస్టర్‌ను చూశారా? ఐసీయూ అంటే తెలుసా?

అపూర్వారావును ప్రశ్నించిన సిర్పుర్కర్‌ కమిషన్‌

ఈనాడు, హైదరాబాద్‌: ‘దిశ’ హత్యాచార కేసు నిందితుల ఎన్‌కౌంటర్‌ ఘటనలో పాల్గొన్న పోలీసులు వినియోగించిన తూటాల లెక్క తేల్చేందుకు సంబంధిత ఠాణాల్లోని ఆయుధాల రిజిస్టర్‌ను తనిఖీ చేశారా? అని వనపర్తి ఎస్పీ అపూర్వారావును జస్టిస్‌ సిర్పుర్కర్‌ కమిషన్‌ ప్రశ్నించింది. తనిఖీచేయలేదని ఆమె బదులిచ్చారు. చటాన్‌పల్లి ఎన్‌కౌంటర్‌ ఘటనపై ఏర్పాటైన సిట్‌కు సంబంధించి కేస్‌ డైరీ రాసిన అపూర్వారావును శనివారం కమిషన్‌ విచారించింది. ఎన్‌కౌంటర్‌లో గాయపడినట్లుగా చెబుతున్న పోలీసులకు చికిత్స చేసిన ఆసుపత్రిని సందర్శించిన సమయంలో క్షతగాత్రులు ఐసీయూలో ఉన్నారా? సాధారణ వార్డులో ఉన్నారా అని ప్రశ్నించగా.. సాధారణ వార్డులోనే ఉన్నారని ఆమె బదులిచ్చారు. తీవ్రమైన గాయాలతో ఉన్నారని సిట్‌ నివేదికలో ఉందని.. అలాంటి వారిని సాధారణ వార్డులో ఎలా ఉంచారని కమిషన్‌ సభ్యులు ప్రశ్నించారు. ఐసీయూ, ఐసీసీయూ, సాధారణ వార్డులకు తేడా తెలుసా అని అసహనం వ్యక్తం చేశారు. అనంతరం శంషాబాద్‌ డీసీపీ ప్రకాశ్‌రెడ్డిని కమిషన్‌ ప్రశ్నించింది. ‘దిశ’ అత్యాచారానికి గురైందని మీరు ఎలా నిర్ధారణకు వచ్చారు అని అడిగింది. ఘటనాస్థలిలో ‘దిశ’ చున్నీ, లాకెట్‌, దుస్తులు పడి ఉండటంతోపాటు నిందితులు పురుషులు కావడంతో అత్యాచారం జరిగిందని ఊహించామన్నారు. ఆ వస్తువులు దొరికినంత మాత్రాన అత్యాచారం జరిగినట్లు ఎలా భావిస్తారని కమిషన్‌ ప్రశ్నించగా.. మౌనంగా ఉండిపోయారు. ఎన్‌కౌంటర్‌ తర్వాత మెజిస్ట్రేట్‌ వచ్చేవరకు ఘటనాస్థలి నుంచి మృతదేహాల్ని తరలించొద్దనే విషయం మీకు తెలియదా? అని అడగ్గా.. అలా చేయడం సరికాదని అంగీకరించారు.

కమిషన్‌ విచారణకు సజ్జనార్‌!

‘దిశ’ హత్యాచారం, నిందితుల ఎన్‌కౌంటర్‌ జరిగిన సమయంలో సైబరాబాద్‌ కమిషనర్‌గా ఉన్న సజ్జనార్‌ వచ్చే బుధవారం కమిషన్‌ విచారణకు హాజరు కానున్నట్లు సమాచారం.

Advertisement


Tags :

ప్రధానాంశాలు

జిల్లా వార్తలు

దేవతార్చన


మరిన్ని