తెలంగాణ సచివాలయం కూల్చివేతకు రంగం సిద్ధమవుతుండడంతో ఆ ప్రాంగణంలోని పాత వాహనాలన్నింటిని అధికారులు బయటకు తరలించారు. నిరుపయోగంగా, నడవని స్థితిలో దాదాపు వందకు పైగా కార్లు, కొన్ని ఆటోలు, ద్విచక్ర వాహనాలు ఈ ప్రాంగణంలో పడి ఉన్నాయి. ఇటీవలే న్యాయశాఖకు కొత్త వాహనాలను సమకూర్చగా అక్కడి పాత వాహనాలు ఇక్కడికే వచ్చాయి. సచివాలయ భవనాలన్నింటిని కూల్చివేసేందుకు వీలుగా మొత్తం ఆవరణను ఖాళీ చేయాలని ప్రభుత్వం ఆదేశించింది. దీంతో వాహనాలన్నింటిని బుధవారం క్రేన్‌ల ద్వారా నిజాం కళాశాల మైదానానికి తరలించారు. నడిచే స్థితిలో ఉన్న వాటిని త్వరలో బహిరంగ వేలం వేస్తారు. మిగిలినవి తుక్కుకింద విక్రయిస్తారు. త్వరలో సచివాలయం కూల్చివేత పనులు ప్రారంభం కానున్నట్లు తెలిసింది.       

-ఈనాడు, హైదరాబాద్‌