మెదడూ ‘దృఢమే’

ఆహారం ఆరోగ్యం

మెదడూ ‘దృఢమే’

రోజూ క్రమం తప్పకుండా వ్యాయామం చేయటం, శారీరక శ్రమ చేస్తూ చురుకుగా ఉండటం శరీరానికే కాదు. మెదడుకూ మేలు చేస్తుంది. ఇది వయసుతో పాటు వృద్ధాప్యంలో వచ్చే మతిమరుపు నివారణకు తోడ్పడుతుంది. అప్పటి సంగతి అప్పుడు చూసుకుందాంలే. ఇప్పుడెందుకని పెదవి విరిచేవారు లేకపోలేదు. ఇలాంటివారి కోసమే అన్నట్టు జర్మనీ అధ్యయనం ఒకటి మంచి కబురు మోసుకొచ్చింది. యువతీ యువకుల్లోనూ శారీరక దారుఢ్యానికీ మేధో నైపుణ్యానికి సంబంధం ఉంటున్నట్టు తేలింది మరి. ఇందులో సగటున 28 ఏళ్ల వయసువారిని ఎంచుకొని వారి మెదళ్లను స్కాన్‌ చేశారు. జ్ఞాపకశక్తి, కార్యకారణ విచక్షణ, చురుకుదనం వంటివీ పరిశీలించారు. అలాగే రెండు నిమిషాల సేపు వీలైనంత త్వరగా వీలైనంత దూరం నడిచే పరీక్ష పెట్టారు. వేగంగా, ఎక్కువ దూరం నడిచినవారు విషయగ్రహణ పరీక్షల్లోనూ మరింత మెరుగ్గా రాణించటం గమనార్హం. అందువల్ల సోమరితనం విడిచిపెట్టి కాళ్లకు, కండరాలకు కాసింత పని చెప్పండి. మెదడుకూ హుషారునివ్వండి!

‘నిగనిగ’ బాదం!

చర్మం నిగనిగలాడాలని, త్వరగా ముడతలు పడొద్దని కోరుకుంటున్నారా? అయితే వీలైనప్పుడల్లా బాదం పప్పును నోట్లో వేసుకోండి. ఇది చర్మం ముడతల సైజు, తీవ్రత తగ్గటానికి తోడ్పడుతున్నట్టు కాలిఫోర్నియా విశ్వవిద్యాలయ అధ్యయనం పేర్కొంటోంది. నెలసరి నిలిచిపోయిన మహిళల్లో కొందరికి రోజువారీ ఆహారంలో కొద్దిగా బాదం పప్పు ఇచ్చి ఫలితాలను బేరీజు వేశారు. బాదం పప్పు తినని వారితో పోలిస్తే.. తిన్నవారిలో ముడతల సైజు 10% వరకు తగ్గటం గమనార్హం. దీంతో మరింత పెద్దఎత్తున పరిశోధన నిర్వహించాలని పరిశోధకులు భావిస్తున్నారు. వాటి ఫలితాల మాటెలా ఉన్నా బాదం పప్పులోని ఒమేగా 3 కొవ్వు ఆమ్లాలు ఒక్క చర్మ ఆరోగ్యానికే కాదు, క్యాన్సర్ల వంటి తీవ్ర సమస్యల నివారణకూ తోడ్పడతాయి. క్రమం తప్పకుండా తీసుకుంటే మంచి ఆరోగ్యాన్ని సొంతం చేసుకోవచ్చు. జబ్బుల బారినపడకుండా కాపాడుకోవచ్చు.

శాకాహారులా.. కోలిన్‌పై కన్నేయండి!

మెదడు ఆరోగ్యానికి కోలిన్‌ చాలా అవసరం. ఇది జ్ఞాపకశక్తి, మానసిక స్థితి వంటి వాటికి కీలకమైన అసిటిల్‌కోలిన్‌ అనే నాడీ రసాయనాన్ని ఉత్పత్తి చేస్తుంది. దీన్ని మన కాలేయం కొంతవరకు తయారు చేస్తుంటుంది గానీ మెదడు చేసే అన్ని పనులకు అది సరిపోదు. దీన్ని ఆహారం ద్వారానే తీసుకోవాల్సి ఉంటుంది. కాకపోతే గుడ్లు, చేపలు, చికెన్‌ వంటి మాంసాహారంలోనే ఎక్కువగా ఉంటుంది. శాకాహారంలో అంతగా ఉండదు. అందువల్ల పూర్తిగా శాకాహారం తినేవారు కోలిన్‌ లభించే పాలు, పెరుగు, ఛీజ్‌, ఉడకబెట్టిన బంగాళాదుంపలు, కొన్నిరకాల పుట్టగొడుగులు, క్వినోవా, రాజ్‌మా మరింత ఎక్కువగా తినటం మంచిది. గర్భం ధరించినప్పుడు, నెలసరి నిలిచిన తర్వాత కోలిన్‌ అవసరం ఇంకాస్త ఎక్కువన్న సంగతీ గుర్తుంచుకోవాలి.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

ఆహారం ఆరోగ్యం

మరిన్ని

రుచులు

App