పొలుసులకువెరవొద్దు!

నేడు ప్రపంచ సోరియాసిస్‌ దినం

చర్మం మీద చిన్న మచ్చ కనిపిస్తేనే మనసు కలవరపడుతుంది. అలాంటిది ఎర్రగా, మందంగా మచ్చలు పడితే? వాటి మీద పొలుసుల్లాంటివి పుట్టుకొచ్చి, అదేపనిగా రాలుతుంటే? అందుకే సోరియాసిస్‌ అనగానే ఎక్కడలేని ఆందోళన కలుగుతుంది. నలుగురూ ఏమనుకుంటారేమోననే మథన మొదలవుతుంది. నిజానికి అంత భయపడాల్సిన పనిలేదని, అవగాహన పెంచుకుంటే హాయిగా గడపొచ్చని ‘ప్రపంచ సోరియాసిస్‌ దినం’ నినదిస్తోంది. ఒకరికొకరం కలిసికట్టుగా నడుం బిగించి, చైతన్యం పెంపొందించుకోవాలని సూచిస్తోంది.

మన శరీరానికి చర్మమే రక్షణ కవచం. బ్యాక్టీరియా వంటి సూక్ష్మక్రిములు లోనికి ప్రవేశించకుండా ఉండటానికైనా, అందంగా కనిపించటానికైనా ఇదే కీలకం. పైకి ఒకే పొరలా కనిపించినా మన చర్మం ఐదు పొరలతో మృదువుగా, అదే సమయంలో కోట గోడలా దృఢంగా నిలుస్తూ నిరంతరం కాపాడుతుంది. సోరియాసిస్‌ సరిగ్గా ఇక్కడే దెబ్బకొడుతుంది. ఎక్కడ పొడసూపితే అక్కడ చర్మం రూపాన్ని, దృఢత్వాన్ని అస్తవ్యస్తం చేస్తుంది. మృదుత్వాన్ని ఛిద్రం చేసి సౌందర్యాన్ని చెడగొడుతుంది. ఒకపట్టాన మానకుండా విడవకుండా వేధిస్తుంది. అంటువ్యాధి కాకపోయినా అంతా అనుమానంగా చూస్తుండటం, తాకటానికీ జంకుతుండటం మరింత ఆందోళనకు గురిచేస్తుంది. ఇది ఆత్మన్యూనతకు, కుంగుబాటుకు దారితీస్తుంది. అంతమాత్రాన భయపడాల్సిన పనిలేదు. తగు చికిత్స తీసుకుంటూ, జీవనశైలిని మార్చుకుంటూ, జాగ్రత్తలు పాటిస్తే దీన్ని చాలావరకు అదుపులో ఉంచుకోవచ్ఛు కొందరిలో పూర్తిగానూ నయం కావొచ్ఛు కావాల్సిందల్లా సమస్యపై అవగాహన పెంచుకొని మసలుకోవటమే. లేకపోతే ఇతరత్రా సమస్యలకు దారితీయొచ్ఛు సమస్య తీవ్రమైతే కీళ్లు, గోళ్లు, గుండె, కాలేయం వంటి వాటి మీదా పెను ప్రభావం పడొచ్ఛు మధుమేహం ముప్పూ పెరగొచ్ఛు.

ఏంటీ పొలుసుల జబ్బు?

మన చర్మ కణాల్లో పాతవి ఎప్పటికప్పుడు రాలిపోతుంటాయి. చర్మం కింది పొరల్లోంచి కొత్త కణాలు పుట్టుకొచ్చి వీటిని భర్తీ చేస్తుంటాయి. ఇలా కొత్త కణాలు పైకి చేరుకోవటానికి సాధారణంగా 26 రోజులు పడుతుంది. అదే సోరియాసిస్‌లో కొత్త కణాలు ఎక్కువెక్కువగా తయారవుతూ.. 3, 4 రోజుల్లోనే పైకి వచ్చేస్తాయి. దీంతో చర్మం మీద మందమైన ఎర్రటి మచ్చలు, వాటిపై తెల్లటి పొలుసులు ఏర్పడి రాలిపోతుంటాయి.

ఎందుకు వస్తుంది?

సోరియాసిస్‌ ఎందుకొస్తుందనేది కచ్చితంగా తెలియదు. మన రోగనిరోధకశక్తిలో భాగమైన కణాలు, వాటి నుంచి వెలువడే సైటోకైన్లు పొరపాటున మన చర్మకణాల మీదే దాడిచేయటం దీనికి దోహదం చేస్తుండొచ్చనేది పరిశోధకుల భావన. దీంతో వాపు, చర్మకణాలు వేగంగా పుట్టుకురావటం వంటివి మొదలవుతాయి. పొలుసులు శరీరంలో ఎక్కడైనా తలెత్తొచ్ఛు మోచేతులు, మోకాళ్లు, మాడు, వీపు, అరచేతులు, అరికాళ్ల మీద అధికంగా కనిపిస్తాయి.

సుమారు 3 కోట్ల మంది..

సోరియాసిస్‌ దీర్ఘకాల చర్మ సమస్య. కొందరిని జీవితాంతం విడవకుండా వేధించొచ్ఛు ప్రపంచవ్యాప్తంగా సుమారు 25 కోట్ల మంది.. మనదేశంలోనైతే సుమారు 3 కోట్ల మంది దీంతో బాధపడుతున్నారని అంచనా.

లక్షణాలు

* లేత గులాబీ లేదా ఎర్రటి రంగులో మందమైన మచ్చలు. వీటిపై తెల్లటి పొలుసులు

* చర్మం ఎండిపోవటం, పగిలిపోవటం

* చర్మం మంట పుట్టటం, దురద, నొప్పి

పోవచ్ఛు. రావొచ్చు!

సోరియాసిస్‌ పొలుసులు ఎప్పుడెలా ఉంటాయో ఊహించలేం. చాలావరకు దీర్ఘకాలం విడవకుండా వేధిస్తుంటాయి. కొంతకాలం లక్షణాలేవీ కనిపించకపోవచ్ఛు కొన్నిసార్లు హఠాత్తుగా ఉద్ధృతం కావొచ్ఛు కొన్ని బయటి అంశాలు దీన్ని ప్రేరేపితం చేస్తుంటాయి. వీటిని గుర్తించి జాగ్రత్త పడటం మంచిది.

* గొంతునొప్పి, జలుబు వంటి ఇన్‌ఫెక్షన్లు

* రోగనిరోధకశక్తిని తగ్గించే జబ్బులు

* మానసిక ఒత్తిడి

* అధిక రక్తపోటును తగ్గించే బీటా బ్లాకర్లు, మలేరియాను తగ్గించే క్లోరోక్విన్‌, మానసిక సమస్యలకు వాడే లిథియం వంటి మందులు

* అధిక వేడి లేదా చల్లటి వాతావరణం

* కాలుష్య కారకాలు

* పొగతాగే అలవాటు

* అతిగా మద్యం తాగటం

* చర్మానికి గాయాలు కావటం

ఎవరికి ముప్పు?

సోరియాసిస్‌ ఎవరికైనా, ఏ వయసులోనైనా రావొచ్ఛు కాకపోతే పెద్దవారిలో ఎక్కువ. దీని ముప్పు పెరగటానికి కొన్ని అంశాలు దోహదం చేస్తాయి.

* తల్లిదండ్రుల్లో ఎవరికైనా సోరియాసిస్‌ ఉండటం

* తీవ్రమైన మానసిక ఒత్తిడి

* ఊబకాయం

* పొగ అలవాటు

చుండ్రు కాదు

తల మీద సోరియాసిస్‌ వచ్చినప్పుడు కొందరు చుండ్రుగా పొరపడుతుంటారు. సోరియాసిస్‌ తలంతా రాదు. అక్కడక్కడా మచ్చల్లా, పెద్ద పెద్ద పొక్కుల్లా తెల్లగా ఉంటుంది. చుండ్రు అయితే తలంతా కనిపిస్తుంది. పొలుసులు సైతం కాస్త నూనె మడ్డితో కూడుకొని ఉంటాయి. అదే సోరియాసిస్‌ పొలుసులు కాస్త పెద్దగా, తెల్లగా, పొడి పొడిగా ఉంటాయి.

అంటువ్యాధి కాదు

సోరియాసిస్‌ అంటువ్యాధి కాదు. ఒకరి నుంచి మరొకరికి వ్యాపించదు. పెళ్లి చేసుకోవటానికి ఎలాంటి సంకోచాలు వద్ధు దాంపత్య జీవనానికి వచ్చిన ఇబ్బందేమీ లేదు. సోరియాసిస్‌ కొంతవరకు వంశపారంపర్యంగా వచ్చే అవకాశం ఉన్నప్పటికీ తల్లిదండ్రుల నుంచి పిల్లలకు తప్పకుండా వస్తుందని చెప్పటానికి ఆధారాలేవీ లేవు. తల్లిదండ్రుల్లో ఒకరికి సోరియాసిస్‌ ఉంటే పిల్లలకు వచ్చే అవకాశం 8-10% మాత్రమే. అదే తల్లిదండ్రులిద్దరికీ ఉంటే 30-50% వరకు పిల్లలకు రావొచ్ఛు.

కీళ్ల మీదా ప్రభావం!

సోరియాసిస్‌ కొందరిలో (8-30% మందిలో) కీళ్ల మీదా ప్రభావం చూపుతుంటుంది. దీంతో కీళ్లు వాస్తాయి (సోరియాటిక్‌ ఆర్థ్రయిటిస్‌). ముఖ్యంగా చేతి, కాలి వేళ్ల కీళ్ల మీద ఎక్కువగా ప్రభావం చూపుతుంది. మోచేయి, మోకాలి కీళ్లు.. తుంటి ఎముక, వెన్నెముక వంటివీ దెబ్బతినొచ్ఛు ఇలాంటివాళ్లు చాలా జాగ్రత్తగా ఉండాల్సి ఉంటుంది.

రకరకాలు

ప్లాక్‌ సోరియాసిస్‌: చాలామందిలో కనిపించేది ఇదే. ఒంటి మీద కొన్ని భాగాలకే పరిమితమవుతుంది. మోచేతులు, మోకాళ్లు, తల వంటి వాటికి ఎక్కువగా వస్తుంది. మొదట్లో కొన్ని మచ్చలతో మొదలైనా ఒళ్లంతా విస్తరించొచ్ఛు

గట్టేట్‌ సోరియాసిస్‌: ఇది పిల్లల్లో ఎక్కువ. దీనికి మూలం ఇన్‌ఫెక్షన్లు. విషజ్వరాలు, గొంతునొప్పి, టాన్సిల్స్‌ వాపు వంటివి వచ్చినప్పుడు కనిపిస్తుంది. ఇందులో చర్మం మీద చిన్న చిన్న నీటి బిందువుల్లా పొక్కులు ఏర్పడతాయి. యాంటీబయోటిక్స్‌తో త్వరగానే తగ్గిపోతుంది.●

పామో, ప్లాంటార్‌ సోరియాసిస్‌: ఇది అరికాళ్లు, అరచేతుల్లోనే వస్తుంది. అక్కడికే పరిమితమవుతుంది. అరుదుగా ఇతర భాగాలకు వ్యాపించొచ్ఛు వీరిలో అరిచేతులు, అరికాళ్ల చర్మం మందంగా మారి, చిన్న చిన్న పగుళ్లు వస్తాయి.●

ఫ్లెక్సురల్‌ సోరియాసిస్‌: ఛాతీ కింద, చంకల కింద, గజ్జల్లో, చర్మం ముడతలు పడే చోట వచ్చే రకం. ఇది త్వరగా నయం కాదు.●

ఎరిత్రోడెర్మిక్‌ సోరియాసిస్‌: ఒళ్లంతా విస్తరించే రకమిది. చాలా తీవ్రమైంది. చర్మానికి చాలా ఎక్కువగా రక్త సరఫరా కావటం వల్ల గుండె పెద్దగా అవుతుంటుంది. ఊపిరితిత్తుల ఇన్‌ఫెక్షన్లు, చర్మ ఇన్‌ఫెక్షన్లు, కిడ్నీ వైఫల్యం వంటివీ తలెత్తొచ్ఛు●

పశ్చులర్‌ సోరియాసిస్‌: ఇందులో మచ్చల మధ్యలో అక్కడక్కడ చీము పొక్కులు ఏర్పడతాయి. కొందరికి చీము పొక్కులు ఒళ్లంతా విస్తరించొచ్ఛు దీనికి అత్యవసరంగా చికిత్స చేయాల్సి ఉంటుంది.

నెయిల్‌ సోరియాసిస్‌: ఇందులో గోళ్ల మీద చిన్న చిన్న గుంతలు పడతాయి. క్రమంగా గోళ్లు మందమవుతాయి, మాడిపోతాయి, నల్లగా అవుతాయి. కొందరిలో గోళ్లు రాలిపోవచ్ఛు

ఎంథిసైటిస్‌ సోరియాసిస్‌: కీళ్లకు అంటుకుని ఉండే కండర బంధనాలకు సంబంధించిన రకమిది. కీళ్లు బాగానే ఉంటాయి గానీ నొప్పి తీవ్రంగా వేధిస్తుంది.

లీనియర్‌ సోరియాసిస్‌: ఇది ఒంటి మీద నిలువు గీత మాదిరిగా వస్తుంది.

చికిత్సలు- రకరకాలు

మధుమేహం, అధిక రక్తపోటు మాదిరిగానే సోరియాసిస్‌ దీర్ఘకాల సమస్య. దీన్ని పూర్తిగా నయం చేయలేకపోవచ్చు గానీ మందులతో అదుపులో ఉంచుకోవచ్ఛు దీనికి మాత్రలు, మలాములు, ఇంజెక్షన్లు, ఫొటోథెరపీ వంటి చికిత్సలు ఉన్నాయి. సోరియాసిస్‌ రకం, తీవ్రత, ఏర్పడిన భాగం, ఇతరత్రా సమస్యలను దృష్టిలో పెట్టుకొని ఎలాంటి చికిత్స అవసరమన్నది డాక్టర్లు నిర్ణయిస్తారు. ●

పై పూతలు: ఒకట్రెండు చోట్ల మచ్చలు ఉన్నప్పుడు కార్టికో స్టిరాయిడ్‌ మలాములు బాగా పనిచేస్తాయి. వీటితో వాపు, దురద తగ్గుతాయి. స్టిరాయిడ్లకు కోల్‌ తార్‌, శాలిసిలిక్‌ యాసిడ్‌ కలిపిన పూత మందులూ మేలు చేస్తాయి. రెటినాయిడ్స్‌, విటమిన్‌ డి, డ్రైథ్రనాల్‌ వంటి కొత్తరకం పూత మందులూ ఉన్నాయి. అవసరమైతే సోరియాసిస్‌ ఉన్నచోట ఇంజెక్షన్లు ఇవ్వాల్సి ఉంటుంది.

ఫొటోథెరపీ: మలాములతో సమస్య తగ్గకపోయినా, ఒంటి మీద మచ్చలు బాగా విస్తరించినా అతి నీలలోహిత కిరణాల చికిత్స చేస్తారు. ఎండలో నిలబడటం లేదా కృత్రిమంగా అతినీలలోహిత కిరణాలతో చేసే ‘పూవా’, ఎన్‌బీ యూవీబీ చికిత్సతో చర్మకణాలు అడ్డదిడ్డంగా పెరగటం తగ్గుతుంది.

మిశ్రమ చికిత్స: కొందరికి పైపూత మందు రాసుకొని లేదా లోపలికి మందు తీసుకొని ఫొటోథెరపీ చేయాల్సి రావొచ్ఛు పొలుసులు తీవ్రంగా వేధిస్తున్నప్పుడు చర్మానికి కోల్‌తార్‌ రాసుకొని స్నానం చేసి ఎండలో నిలబడితే మంచి ఫలితం కనిపిస్తుంది. దీన్నే ‘గోకర్‌మెన్‌ రెజీమ్‌’ అంటారు. అలాగే లోపలికి సొరలిన్‌ మాత్రలు ఇచ్ఛి. బయటి నుంచి ఫొటోథెరపీ చేయొచ్ఛు

మందులు: ఫొటోథెరపీ వంటి వాటితో ఫలితం కనిపించకపోతే కొన్ని మందులు ఇవ్వాల్సి ఉంటుంది. ముఖ్యంగా క్యాన్సర్‌ చికిత్సలో వాడే మిథోట్రిక్సేట్‌ను తక్కువ మోతాదులో ఇస్తే మంచి ఫలితం ఉంటుంది. కాకపోతే దీన్ని స్వల్పకాలమే తీసుకోవాలి. ఎక్కువకాలం వేసుకుంటే కాలేయం దెబ్బతినొచ్ఛు దీన్ని డాక్టర్ల పర్యవేక్షణలోనే తీసుకోవాలి. అత్యవసరమైతే రోగనిరోధకశక్తిని మార్చే సైక్లోస్పోరిన్‌ వంటి మందులిస్తారు. రెటినాయిడ్స్‌, అప్రిమిలాస్ట్‌ మందులూ ఉపయోగపడతాయి.

బయోలాజికల్స్‌: ఇవి జంతువులు లేదా మనుషుల నుంచి తీసిన ప్రోటీన్లు. సోరియాసిస్‌కు మూలమైన రోగనిరోధక వ్యవస్థ మీదనే నేరుగా పనిచేస్తాయి. సమస్య చర్మం వరకూ రాకుండా మూలంలోనే అడ్డుకుంటాయి. ఇతర అవయవాలపై అంతగా ప్రభావం చూపకపోవటం వల్ల వీటితో దుష్ప్రభావాలు తక్కువ. దీర్ఘకాలం ఉపశమనం కలిగిస్తాయి. కాకపోతే వీటి ఖరీదు ఎక్కువ. బయోలాజికల్స్‌ మాదిరిగానే పనిచేసే బయోసిమిలర్లూ ఇప్పుడు అందుబాటులో ఉన్నాయి. ఇవి కాస్త తక్కువ ధరకు లభిస్తాయి.

జీవితాంతం ఉంటుందా?

సోరియాసిస్‌ జీవితాంతం ఉంటుందని కొందరు భావిస్తుంటారు. దీర్ఘకాలం వేధించేదే అయినా ఇది జీవితాంతం ఉంటుందని కచ్చితంగా చెప్పలేం. సుమారు 30% మందిలో జబ్బు దీర్ఘకాలం వరకూ రాకుండా ఉంటుంది. మిగతావారిలో వస్తూ, పోతూ చికాకు పెడుతుంది.

శాకాహారం మేలా?

సోరియాసిస్‌ బాధితులు శాకాహారం తీసుకోవటమే మేలు. మాంసాహారులైతే మితం పాటించాలి. సోరియాసిస్‌ బాధితులకు చేపలు మేలు చేస్తాయి. అందుకే వీరికి చేప నూనె మాత్రలు ఇస్తుంటారు.

జీవనశైలి మార్పులూ ముఖ్యమే

చికిత్సతో పాటు జీవనశైలి మార్పులు పాటిస్తుంటే సమస్య నియంత్రణలో ఉండేలా చూసుకోవచ్ఛు

* అధిక బరువుంటే తగ్గించుకోవాలి

* మధుమేహం గలవారు గ్లూకోజును అదుపులో ఉంచుకోవాలి

* తాజా పండ్లు, కూరగాయలు, ఆకుకూరలు, క్యారెట్‌ రసం, నారింజ రసం ఎక్కువగా తీసుకోవాలి.

* అవిసె గింజెలు, అక్రోట్లు మేలు.

* మద్యం, పొగ అలవాట్లుంటే వెంటనే మానెయ్యాలి

* రోజూ క్రమం తప్పకుండా వ్యాయామం చెయ్యాలి

* మానసిక ఒత్తిడి తగ్గించుకోవాలి. యోగా, ధ్యానం, ప్రాణాయామం వంటివి ఉపయోగపడతాయి.

* చలికాలంలో వెచ్చటి దుస్తులు ధరించాలి. చర్మానికి చల్లగాలి తగలకుండా చూసుకోవాలి.

* గాయాలు కాకుండా జాగ్రత్త పడాలి.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి