వచ్చేసింది ‘సీతా’కాలం..! - Sunday Magazine
close

వచ్చేసింది ‘సీతా’కాలం..!

పండు ఏదయినా కంటికి నచ్చితేనే కదా, నోటివరకూ వెళ్లేదీ...అందుకే లేతాకుపచ్చరంగులో అంతగా ఆకర్షించని సీతాఫలం సైతం నేడు రంగుల్ని మార్చుకుంటోంది. ఒకప్పుడు రాళ్లల్లో రప్పల్లో కొండల్లో గుట్టల్లో ఎక్కడంటే అక్కడ పెరిగే ఆ మృదుఫలం, నేడు నర్సరీల్లో తోటల్లో పెరుగుతూ మరింత తియ్యగా పోషకభరితంగా భారీ సైజులోనూ పండుతోంది.

శీతగాలి తిరిగిందంటే చాలు... ఒకప్పుడు పల్లెల్లో ఉదయాన్నే కావిళ్లతోనో సైకిళ్లమీదో సీతాఫలాలు అమ్మొచ్చేవి. వాటికోసం పిల్లలు కాచుక్కూచుని, కొన్నవాటిలో పండిన వాటికోసం పోటీపడేవారు. పచ్చివి పండేయడం, అవి పండాయో లేదో అని చూడటం... మొత్తంగా ఈ కాలమంతా ఇంటిల్లిపాదికీ సీతాఫలమే అల్పాహారం.మృదువుగా తియ్యగా ఉండే ఆ పండులో చక్కెర తప్ప ఇంకేదీ ఉండదనీ, తింటే జలుబు చేస్తుందనీ కొందరు పొరబడతారు. కానీ అన్ని పండ్లలానే సీతాఫలంలోనూ పోషకాలనేకం. సి-విటమిన్‌తోపాటు ఎ, బి, కె విటమిన్లూ ప్రొటీన్లూ కాల్షియం, ఫాస్ఫరస్‌... వంటి మూలకాలూ ఎక్కువే. ఈ పోషకాలన్నీ రక్తంలో హీమోగ్లోబిన్‌ శాతాన్నీ పెంచుతాయట.

రంగురంగులు..!

సీతాఫలం... అనగానే ఎవరికైనా లేతాకుపచ్చరంగు తొక్కలతో తెల్లని గుజ్జుతో నల్లని గింజలతో ఉన్న రూపమే గుర్తొస్తుంది. కానీ ఈమధ్య అది ఎరుపూ ఊదా రంగుల్లోనూ పండుతోంది. కేవలం తొక్కే కాదు, లోపలి గుజ్జు సైతం ఎరుపూ గులాబీ రంగుల్ని సంతరించుకునేలా చేస్తున్నారు. ఇవి కూడా ఆకుపచ్చని పండులానే మంచి వాసనతో తియ్యగా ఉంటాయి. దాంతో ఒకప్పుడు కొండల్లో మాత్రమే పెరిగే సీతాఫలాన్ని నేడు చాలామంది రైతులు సాగుచేస్తూ లాభాలనూ ఆర్జిస్తున్నారు. గింజలు తక్కువగానూ గుజ్జు ఎక్కువగానూ ఉండే హైబ్రిడ్‌ రకాలనీ రూపొందిస్తున్నారు. అస్సలు గింజలు లేని రకాలనీ కొన్నిచోట్ల పండిస్తున్నారు. ఫలితంగా ఈ పండు మామిడిని మించిన ధరతో కిలో వంద నుంచి ఐదు వందల రూపాయల వరకూ పలుకుతోంది. మహారాష్ట్రలోని
పింపరి డుమాల గ్రామీణులైతే ఊరంతా సీతాఫలతోటల్నే వేసి సంపన్నులుగా మారారు.

రకరకాలు..!

సీతాఫలం... పేరు విని ఇదేదో మనదగ్గరే పుట్టి పెరిగింది అనుకోవద్దు. దక్షిణ అమెరికా నుంచి పదహారో శతాబ్దంలో పోర్చుగీసు వాళ్ల ద్వారా వచ్చింది. శీతగాలి తిరగ్గానే వస్తాయి కాబట్టి శీత ఫలం అని ఉండొచ్చు. కానీ  సీతాఫలం(అనోనా స్క్వామోజా)తోపాటు దాన్ని పోలిన మిగిలిన జాతులకు రామ(రెటిక్యులేటా), లక్ష్మణ(మురిక్యులేటా), హనుమాన్‌(చెర్మోయా) పేర్లు ఉండటం, అవి అంతర్జాతీయంగానూ పేరొందడం చెప్పుకోదగ్గ విశేషం. సీతాఫలాన్నే ఇంగ్లిష్‌లో షుగర్‌ ఆపిల్‌ అనీ, లేత ఊదా ఎరుపు రంగుల్లో నున్నగా ఉండే రామాఫలాన్ని కస్టర్డ్‌ ఆపిల్‌గానూ పిలుస్తారు. మిగిలిన వాటితో పోలిస్తే ఈ రెండింటి వాడకమే మనదగ్గర ఎక్కువ. ఇటీవల సీతాఫలాన్ని హనుమాన్‌ ఫలంతో సంకరీకరించి అట్మోయా అనే హైబ్రిడ్‌ రకాన్నీ పుట్టించారు. బిరిబా, గ్లాబ్రా, క్రిసోఫైలా... ఇలా అనోనా జాతులు మరెన్నో ఉన్నాయి. ఇవన్నీ ఔషధఫలాలే. స్థానిక అమెరికన్లు సంప్రదాయ వైద్యంలోనూ మనదగ్గర ఆయుర్వేదంలోనూ కాయలతోపాటు ఆకుల్నీ బెరడునీ వాడుతుంటారు. ముఖ్యంగా కీళ్లనొప్పులూ విరేచనాలూ అజీర్తికీ ఈ చెట్ల ఆకుల్నీ బెరడునీ మరిగించి మందుగా ఇస్తారు. వేసవిలో వచ్చే సెగ్గడ్డలకి సీతాఫల ఆకుల ముద్దను కట్టుకడితే త్వరగా తగ్గిపోతుందట. పచ్చికాయల్లో పోషకాలు ఎక్కువని వాటిని కొన్ని ప్రాంతాల్లో కాల్చుకునీ తింటుంటారు. సీతాఫలంతో పోలిస్తే మిగిలిన రకాల్లో గింజలు తక్కువ. కానీ తీపి తక్కువ. అందుకే మనదగ్గర సీతాఫలం వాడుకే ఎక్కువ.

ఉత్పత్తులు..!

పండుని పండుగానే తినే రోజులు పోయాయి. ఇతర పండ్ల మాదిరిగానే సీతాఫలంతోనూ ఐస్‌క్రీమ్‌లూ స్మూతీలూ డెజర్ట్‌లూ కేకులూ సలాడ్లూ షర్బత్‌లూ కుకీలూ... ఇలా ఎన్నో రకాలు చేస్తున్నారు. అన్నింటిలోకీ ఈ పండుతో చేసే ఐస్‌క్రీమ్‌ రుచి అదరహో అంటారు సీతాఫల ప్రియులు. చలికాలంలో మాత్రమే వచ్చే ఈ పండ్లను ఇతర కాలాల్లోనూ తినేలా బైట్స్‌ పేరుతో చాక్లెట్లూ చేస్తున్నారు. ఇక, ఎందులోనైనా వాడుకోగలిగే పొడి సరేసరి.

పోషకాలు..!

సీతాఫలంలో పుష్కలంగా ఉన్న విటమిన్‌-ఎ, ఇతరత్రా పోషకాలు కణజాల పునరుద్ధరణకు తోడ్పడతాయి. అందుకే సీజన్‌లో క్రమం తప్పకుండా సీతాఫలం తింటే జుట్టూ చర్మం ఆరోగ్యంగా ఉంటాయని చెబుతారు ఆరోగ్య నిపుణులు. ఈ పండ్లలోని బి6 విటమిన్‌ ఇన్‌ఫ్లమేషన్‌ని తగ్గించడంతోపాటు ఊపిరితిత్తుల్లోని ఇన్ఫెక్షన్‌ తగ్గడానికీ తోడ్పడుతుంది. అంతేకాదు, ఇది న్యూరోట్రాన్స్‌మిటర్ల ఉత్పత్తిని పెంచడం ద్వారా డిప్రెషన్‌ రాకుండానూ అడ్డుకుంటుంది. అరటిపండ్లలోకన్నా సీతాఫలంలో ఎక్కువగా ఉండే పొటాషియం గుండె ఆరోగ్యానికీ బీపీ తగ్గడానికీ సాయపడుతుంది. అలాగే ఇందులోని మెగ్నీషియం ఆమ్లాలను తొలగించి, కండరాల సాగుదలకి తోడ్పడుతుంది. దాంతో కీళ్లనొప్పులు రాకుండా ఉంటాయి. సీతాఫలాన్ని తినేవాళ్లకి చెడు కొలెస్ట్రాల్‌ను అడ్డుకునే బి3 విటమిన్‌ లోపం లేకుండా ఉంటుందట. ఇది రక్తప్రసరణని పెంచి గుండెజబ్బుల్నీ నివారిస్తుంది. సీతాఫలంలో ఎక్కువగా ఉండే కాపర్‌, పీచు పదార్థాలు మలబద్ధకాన్ని తగ్గించి జీర్ణశక్తిని పెంచేందుకూ రక్తంలోని చక్కెర శాతాన్ని అదుపులో ఉంచేందుకూ తోడ్పడతాయి. ఈ పండ్లలోని ఎసిటోజెనిన్‌, కెటెచిన్‌... వంటి యాంటీఆక్సిడెంట్లూ ఆల్కలాయిడ్లూ క్యాన్సర్‌ కణాలు పెరగకుండా అడ్డుకుంటాయని తాజా పరిశీలనలు చెబుతున్నాయి. అయితే మధుమేహుల్ని గ్లైసెమిక్‌ ఇండెక్స్‌ 55 కన్నా తక్కువ ఉన్నవి మాత్రమే తీసుకోవాలి అంటారు. కాబట్టి మామిడి(51-55), అరటి(51-56) మాదిరిగానే సీతాఫలం (54) జిఐ కూడా మధ్యస్థంగా ఉంటుంది. కాబట్టి మధుమేహ బాధితులు దీన్ని తగు మోతాదులో తింటే మంచిదే. ఎందుకంటే ఇందులోని పొటాషియం, మెగ్నీషియం, మాంగనీస్‌... వంటి మూలకాలు గుండెకు ఎంతో మేలు చేస్తాయి. గర్భిణులకు అవసరమైన ఫోలేట్‌ కూడా ఈ పండ్ల నుంచి లభ్యమవుతుంది. పోషకాలూ ఔషధగుణాలను పక్కనపెడితే అమృత తుల్యమైన సీతాఫలాలకు సీజన్‌ లేకుండా ఉంటే ఎంత బాగుంటుందో అనుకునేవాళ్లు కొకొల్లలు.


ఆ పండులో గింజలు తక్కువ!

తెల్లని గుజ్జులో ఆ నల్లని విత్తనాల కారణంగానే సీతాఫలాన్ని తినడానికి కొందరు ఇష్టపడరు. పైగా పండాక ఇవి నిల్వ ఉండవు. అందుకే తక్కువ గింజలతో ఎక్కువకాలం నిల్వ ఉండే ఎన్‌ఎమ్‌కె-01 గోల్డెన్‌ రకాన్ని రూపొందించాడు మహారాష్ట్రలోని గోరమాలె గ్రామానికి చెందిన నవనాత్‌ మలహారీ కస్పటె. సాధారణ సీతాఫలంలో 70 గింజలుంటే ఎన్‌ఎమ్‌కె-01లో పదీ పదిహేనుకి మించవట. దీని సైజు కూడా పావు కిలో నుంచి ముప్పావుకిలో వరకూ ఉంటుంది. దీంతోపాటు మరికొన్ని రకాల్నీ ఆయన సృష్టించాడు. యాభై ఎకరాల ‘మధుబన్‌ ఫామ్‌’లో తాను రూపొందించిన కొత్త రకాలతోపాటు మహబూబ్‌నగర్‌కు చెందిన బాలానగరి, ఎర్రని సీతాఫలం, అనోనా గ్లాబ్రా, పింక్‌ మేమత్‌, మ్యురికేటా, మాంటానా... ఇలా 42 రకాల్ని సంరక్షిస్తూ పెంచడంతో ప్రపంచ
వ్యాప్తంగా ఎందరో రైతులు ఆయన్ని సంప్రదించి మెలకువలు నేర్చుకుంటుంటారు. దాంతో ఆయన తోట, ‘అతిపెద్ద సీతాఫల నర్సరీ‘గానూ ‘లివింగ్‌ మ్యూజియం’గా పేరొందింది.


Advertisement


ఇంకా..

జిల్లా వార్తలు

దేవ‌తార్చ‌న