close

సమీక్ష

సాటి మనిషి కథలు

పండగల్లో కొత్త పండగలూ పాత పండగలూ ఉండకపోయినా ఈ ‘కొత్త పండగ’ ఆ ఊరికి నిజంగా కొత్తే. కూతురే తప్ప కొడుకు లేని ఒక తండ్రికి తలకొరివి పెట్టడానికి సాగిన బేరసారాలు చూసి ఆ కూతురు తీసుకున్న నిర్ణయం ఫలితమే ‘కొత్త పండగ’లా సాగే తండ్రి ఆఖరి ఊరేగింపు. పెద్ద పెద్ద ఇనుప ముక్కల్నీ కాగితం అట్టల్నీ ప్లాస్టిక్‌ డబ్బాల్నీ కలలు కనే పదమూడేళ్ల ధనమ్మకి ఒకరోజు దొరికిన మెత్తని ఖరీదైన లగ్జరీ వస్తువు ఏంటో, అది చూసి ఆమె ఎందుకు సంబరపడిందో ‘ఒక దేశం ఒక ధనమ్మ’లో చదువుతుంటే కడుపు తరుక్కుపోతుంది. కథల్లో చాలావరకూ శ్రమజీవుల జీవనపోరాటాలే. అందుకే కథనమూ భాషా కూడా సూటిగా మనసుకు హత్తుకుంటాయి.

- పద్మ
కొత్త పండగ (కథలు)
రచన: ఎంఎస్‌కె. కృష్ణజ్యోతి
పేజీలు: 136; వెల: రూ.125/-
ప్రతులకు: ప్రధాన పుస్తకకేంద్రాలు


హాస్యానికి చిరునామా

ఒక తరహా హాస్యం చిరునవ్వును తెప్పిస్తుంది, మరొక రకం పొట్ట చెక్కలు చేస్తుంది, ఇంకో రకం గిలిగింతలు పెడుతుంది. అన్నింటినీ కలగలిపి అనుభవించాలనుకుంటే ఈ పుస్తకం చదవాల్సిందే. పార్టీలు ఫిరాయించే రాజకీయ
నాయకులూ, పదవుల్లో లేకపోయినా చక్రం తిప్పే తెర వెనక నేతలూ, బ్యాంకు రుణాలు ఎగ్గొట్టే బడాబాబుల బాగోతాలూ- ఇలా ఒకటనేమిటి సాధారణ వ్యక్తుల జీవితాల్ని ప్రభావితం చేసే ఎన్నో అంశాల మీద నవ్విస్తూనే చురకలు వేశారు రచయిత. కృష్ణుడికన్నా మామగారిని శరణువేడటం మంచిదని చెప్పే ‘మామే’కం శరణం వ్రజ, వికారినామ సంవత్సరాన్ని గురించి సరదా కబుర్లు పంచే వికారీ విజయీభవ లాంటి వ్యాసాలన్నీ నవ్విస్తాయి.

- హరిత ఇంద్రగంటి
‘సర్వే’శ్వరా గెలిపించరా!
రచన: డాక్టర్‌ శంకరనారాయణ
పేజీలు: 99; వెల: రూ. 100/-
ప్రతులకు: ఫోన్‌- 9399904455


ఆమె కల

ముస్సోలినీ కాలం నాటి రోమ్‌ నగర జీవితాన్ని ప్రతిబింబించే నవల ఇది. మోడలింగ్‌ వృత్తిలో ఉంటూ అనుకోకుండా సంసార లంపటంలో చిక్కుకుపోయిన మహిళ తన కూతురు తనలా కాకూడదని కోరుకుంటుంది. రోమ్‌లోకెల్లా గొప్ప మోడల్‌ కావాలని కలలు కంటుంది. అయితే, ఆమె కుమార్తెకేమో పెళ్లి చేసుకుని ఒక అందమైన ఇంట్లో ఆనందంగా గడపాలని ఉంటుంది. ప్రియుడు మోసగించడం, అత్యాచారానికి గురికావటంతో ఆ అమ్మాయి తన కలలన్నీ కల్లలైనట్లు భావించి చివరికి వేశ్యగా జీవించాలని నిర్ణయించుకుంటుంది. అప్పటినుంచి ఆమె జీవనంలో తారసపడిన వ్యక్తులతో విచిత్రమైన అనుభవాలూ ఎదురైన ఆటుపోట్లూ మానసిక సంఘర్షణల సమాహారమే ఈ నవల.

- నీలి వేణుగోపాల్‌
పతిత; మూలం: ది ఉమన్‌ ఆఫ్‌ రోమ్‌
రచన: ఆల్బెర్ట్‌ మొరావియా
అనుసృజన: బెల్లంకొండ రామదాసు
పేజీలు: 176; వెల: రూ.150/-
ప్రతులకు: ప్రధాన పుస్తకకేంద్రాలు


మజిలీకో కథ

తల్లిదండ్రుల్లేని గుణాకరుడు యోగానందుడు అనే గురువు వద్ద శిష్యరికం చేస్తుంటాడు. గురుశిష్యులిద్దరూ కలిసి రామేశ్వరం బయల్దేరతారు. ఆ దారిలో అనేక మజిలీలు చేస్తూ శిష్యునికి వచ్చే సందేహాలను తీరుస్తూ యోగానందుడు చెప్పిన కథలే ఈ విచిత్ర కాశీ రామేశ్వర మజిలీ కథలు. ప్రతి కథ ఆసక్తిగా, చదివించేదిగా ఉంటూనే అంతర్లీనంగా నీతినీ బోధిస్తుంది. పిసినారి రఘుపతి నాయకుడు తక్కువ జీతానికి బుద్ధిహీనుడైన వెంకన్నను పనిలో పెట్టుకుని అడుగడుగునా పడిన పాట్లు నవ్విస్తే, లోభత్వానికి అతడు చెల్లించిన మూల్యం అందులోని నీతిని చెబుతుంది. పదివేల వరహాలు పెట్టి రాజు కొన్న మంచానికి ఉన్న నాలుగుకోళ్లూ ఏం మాట్లాడుకున్నాయో ఆ మాటల్ని విన్న రాజు ఏం చేశాడో చెబుతుంది మరో కథ. ఇవేకాదు... శాంతం గల పాము, యక్షిణికథ, రంధ్రం గల సమాధి కథ వంటివన్నీ చక్కని కథనశైలితో చదివిస్తాయి.

- నందన
విచిత్ర కాశీరామేశ్వర మజిలీ కథలు
కూర్పు: కందేపు సుధాకర్‌
పేజీలు: 176; వెల: రూ.63/-
ప్రతులకు: ప్రధాన పుస్తకకేంద్రాలు

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.