close


సమీక్ష

సీమ భాష సొబగులు

రాయలసీమ మాండలికానికి అక్షరాభిషేకంగా పరిగణించాల్సిన ఈ కథల్లో పల్లెబతుకు చిత్రమంతా గోచరిస్తుంది. ‘ముందు జూస్తే బాయి, ఎనక జూస్తే దేవరెద్దు, ఎగిరి బాయిలో దబీమని దూకితి’ అంటూ.. ఆ ముందూ వెనకా ఏమైందో చెబుతుంది తొలి కథ. పల్లెంలో నుంచి ఒక మెతుకుని ముక్కున కరుచుకొని కింద మింద పడతా ఎత్తుకొని పోతా ఉన్న చీమ కథ ‘కట్టమింద దేవర’. లోకమంతా నిద్ర ఉయ్యాలలో ఊగుతుంటే, రాళ్ల గూటిలో నుంచి రెపరెపా రెక్కలు కొట్టుకుంటూ లేచే ‘ఉత్తీత’ గువ్వ పాట కళ్లు చెమ్మగిల్లేలా చేస్తుంది. ఇలా కథలన్నీ అనుభూతుల సమాహారాలే!

గోపిని కరుణాకర్‌ కథలు
పేజీలు: 228; వెల: రూ.250/-
ప్రతులకు: ప్రధాన పుస్తక కేంద్రాలు
- శరత్‌బాబు 


ప్రపంచ భాషల ప్రసిద్ధ కథలు

మంచంమీద మనిషి వైపు పిస్టల్‌ చూపించి ‘చేతులు పైకెత్తు’ అని గదమాయించాడు దొంగ. అతడు ఒక చెయ్యే పైకెత్తడంతో, ‘రెండో చేతిలో ఏముంది’ అడిగాడు సందేహంగా. అప్పుడు ఆ వ్యక్తి ఎలా స్పందించాడో, మరుక్షణమే ఏమైందో- ఒళ్లు గగుర్పొడిచేలా చెప్పే ఆంగ్ల కథ ‘ప్రయోగం’. రక్తసిక్తమైన ఎర్రజెండా పట్టుకొని రైలుపట్టాల పక్కన పడిఉన్న రష్యావాసి- ‘నన్ను శిక్షించండి’ అని చుట్టూచేరిన వారిని ఎందుకు కోరాడో ‘సిగ్నల్‌’ వెల్లడిస్తుంది. చదువరి మనసును తట్టి లేపి, ఎవరిలోకి వారు తొంగిచూసుకునేలా చేసే కథలు ఇందులో ఉన్నాయి.

సిగ్నల్‌
అనుసృజన: రంగనాథ రామచంద్రరావు
పేజీలు: 160; వెల: రూ.125/-
ప్రతులకు: ప్రధాన పుస్తకకేంద్రాలు
- సుధామాధురి


వస్తు వైవిధ్యం

ఏ ‘వస్తువు’నైనా మంచికథగా మలచడంలో రచయిత సిద్ధహస్తుడనటానికి నిదర్శనం ఈ కథలు. విలాసపురుషుడైన ఓ కంపెనీ ఛైర్మన్‌ తాను లోబరుచుకుంటున్నానని నమ్ముతున్న ఉద్యోగినిని అతడి కొడుకు ప్రేమించి పెళ్లి చేసుకుంటున్నానని చెప్పడమే ‘ట్విస్ట్‌’. ఎన్నడూ లేనిది ముష్టివాడికి వెయ్యిరూపాయలు ఇవ్వటమే కాక ప్రతి నెలా ఆదాయంలో కొంత దానధర్మాలకు వినియోగించాలని నిర్ణయించుకుంటాడు ఓ వ్యాపారవేత్త. అతనిలో ఆ మార్పు రావటానికి కారణం అతనికి వచ్చిన ‘భూకంపం’ కల. హితవచనం, కథనంలో సంక్షిప్తత, శైలిలో సారళ్యం...ఈ కథల్లోని విశేషం.

జీవనస్వరం (కథలు)
రచన: ఇంద్రగంటి నరసింహమూర్తి
పేజీలు: 198; వెల: రూ. 150/-
ప్రతులకు: ఫోన్‌ 9959352900
- జి.రా. 


అన్నదాత బతుకు చిత్రం

తెలంగాణ పల్లెలో అలా తిరిగి వచ్చిన అనుభూతి, జొన్న చేల మీంచి చిలుకల గుంపులు వరి గొలుసుల జెండాలతో చెలుకలు దాటే దృశ్యాన్ని చూసిన ఆనందం... ఈ కవిత్వం చదివితే వస్తుంది. కంకులు, గొలకలు, గొలుసులు... భాష ఏదైనా భావం అదే. పంటలు పండించడమే పరమ తపస్సు/ లోకుల ఆకలి తీర్చడమే వ్యవసాయశాస్త్రం- అంటూ అన్నదాత గొప్పదనాన్ని చెబుతూనే ఉరితాళ్లు తరుముతున్న చప్పుడు/ మడికట్లల్ల రాలిపోయిన గరుకపోసలు/ నీళ్లు లేని కాలువల్ల కన్నీళ్ల తడి... అంటూ రైతు పాదయాత్రలకు దారితీసిన నేపథ్యాన్ని కళ్లకు కడతారు కవి.

వరి గొలుసులు (కవిత్వం)
రచన: అన్నవరం దేవేందర్‌
పేజీలు: 98; వెల: రూ. 125/-
ప్రతులకు: ఫోన్‌- 9440763479
- శ్రీ

ఇంకా..

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.