Marriage: ధర్మబద్ధ జీవనానికి

వివాహం ఒక సత్సంప్రదాయంగా కొనసాగు తోంది. ఇది అందరూ అనుసరించదగిన సదాచారమన్నారు పెద్దలు. పెళ్లి శారీరక, మానసిక ప్రశాంతతను ప్రసాదించడమే కాదు, కుటుంబ జీవనాన్ని పటిష్టంగా ఉంచుతుంది. అందుకే మన వివాహ వ్యవస్థ ఆదర్శప్రాయమైందంటూ ప్రపంచమంతా కీర్తిస్తుంది.

ఒక స్త్రీకి ఒక పురుషుడు అన్న నిబంధనతో పెళ్లి పద్ధతిని ప్రారంభించారు మన పూర్వీకులు. వివాహం అనగానే ఒక ఇంటివారవుతున్నారు అంటారు. అందాకా ఇల్లు లేదని కాదు. కానీ వారికంటూ కుటుంబం ఏర్పడుతుంది. అదో గుర్తింపు, గౌరవం. ముఖ్యంగా మాటలకందని అనుబంధం. కష్టంలో, సుఖంలో ఎల్లవేళలా కనిపెట్టుకుని ఉండే తోడు దొరుకుతుంది. అన్నిటినీ మించి వివాహంతో ధర్మసాధన సాధ్యమవుతుంది.

వివాహం కేవలం కామ్య కర్మ కాదు. మన పురోభివృద్ధికి, ఆరోగ్యవంతమైన జాతి నిర్మాణానికి, సమైక్య భావనకు, మహోదాత్తమైన అనుబంధాలకు తోడ్పడుతుందంటూ మన పురాణ ఇతిహాసాలు సిద్ధాంతీకరించాయి. ఆధ్యాత్మికతకు ఆలంబన అయిన వివాహ వ్యవస్థ త్రేతాయుగంలోనే ఆరంభమయ్యింది. అంటే ధర్మబద్ధ జీవనం సాగించేందుకు వేల సంవత్సరాలుగా కొనసాగుతున్న ఆచారమిది.

గోవిందం ఉమామహేశ్వర రావు