సాంకేతిక బ్రహ్మ!

ఈనెల 17 విశ్వకర్మ జయంతి

‘కర్మ చేసే వాడు కార్మికుడు. అతడు చేసే పనులు సకల మానవాళికీ ఉపయోగపడేవిగా ఉండాలి’... అని ఉపనిషద్వాక్యం.

ఈ సృష్టి అంతా బ్రహ్మ చేతిలో రూపుదిద్దుకుంది. అది మూల పదార్థం మాత్రమే. అందులో మనిషి మనుగడకు అవసరమైన అనేక రూపాలను సృష్టించే వాడు కార్మికుడు. ఆయన అనేక సంకేతాల ద్వారా పరికరాలను తయారు చేస్తాడు కాబట్టి అతణ్ణి ‘సాంకేతిక నిపుణుడు’ అంటారు. ఆ నైపుణ్యాలకు ఆద్యుడు ‘విశ్వకర్మ’.

వేద పురుషుడు: రుగ్వేదం పదమూడో మండలం 81, 82 సూక్తాలు విశ్వకర్మ గురించి విపులంగా చెబున్నాయి. అధర్వణ వేదం ఆయనను ‘ఆహార ప్రదాత’గా పేర్కొంది. పురుషసూక్తం విశ్వకర్మను విరాట్పురుషుడిగా పేర్కొంది. ఇన్ని రకాలుగా ప్రశంసలు అందుకోడానికి ఆయన శ్రమతత్త్వం, సాంకేతిక ఔన్నత్యం కారణాలు. ఇతడు దేవతలకు కావలసిన నగరాలు, రథాలు, ఆయుధాలన్నిటినీ నిర్మించి ఇచ్చేవాడు. దేవతల కోసం స్వర్గాన్ని నిర్మించింది ఆయనే అని, ద్వాపరయుగంలో ద్వారక, ఇంద్రప్రస్థం, కలియుగంలో హస్తినాపురం నగరాలను నిర్మించిన వాడు విశ్వకర్మే అని పురాణాల్లో ఉంది. మయసభను ఈయన కుమారుడైన మయుడు నిర్మించాడంటారు.

వారంతా ఆయన సంతానమే మనువు, మయుడు, త్వష్ట, శిల్పి, విశ్వజ్ఞ బ్రహ్మలు ఆయన సంతానం. వారు ఇనుము, కర్ర, కాంస్య, శిల్ప, స్వర్ణకారులుగా ప్రసిద్ధులయ్యారు. వారి కారణంగానే మానవుల అవసరాలకు కావాల్సిన సామగ్రి అంతా సమకూరుతోంది. లోకానికి ఇంత మహోపకారం చేసిన విశ్వకర్మను అందరూ పూజించాలని నిశ్చయించుకున్నారు. ఆ విషయం తెలిసిన ఆయన ‘పూజించాల్సింది వ్యక్తిని కాదు శక్తిని... మీ వృత్తికి, భుక్తికి కారణమైన పనిముట్లను పూజించాల’ని ఆదేశించాడు. అలా చేస్తే నన్ను పూజించినట్టే భావిస్తానని బోధించాడు. అప్పటి నుంచి కార్మికులంతా తమ వృత్తులకు సంబంధించిన పరికరాలనే విశ్వకర్మగా భావించి పూజించసాగారు.

భాద్రపద మాసంలో వచ్చేది కన్యా సంక్రమణం. ఇది విశ్వకర్మ జన్మించిన రోజు. అందుకే ఆయన జన్మదినాన ఆయన పేరుతో తమ పరికరాలను, యంత్రాలను, కర్మాగారాలను పూజిస్తారు.

- రమా శ్రీనివాసరావు