మూడు రాష్ట్రాల మురిపెం!

పోలమాంబ.. శంబరలో కొండదొరల కుటుంబంలో జన్మించిందని చెబుతారు. పుణ్యస్త్రీగా కన్నుమూయాలని భావించేది. అందుకే పెళ్లయిన వెంటనే శంబర సమీపంలో వనం గుడి వద్ద అవతారం చాలించిందని అంటారు. ఆ తల్లి కోరిక మేరకు ఏటా జాతర నిర్వహిస్తారు. అమ్మను దర్శించుకుంటే కష్టాలు తొలుగుతాయని భక్తుల విశ్వాసం. శంబర, పరిసర గ్రామాల్లో సంక్రాంతి కన్నా వేడుకగా జాతరనే జరుపుకొంటారు. తోబుట్టువులను, బంధువులను ఇళ్లకు పిలుస్తారు.

ఉత్తరాంధ్రుల ఇలవేల్పు పోలమాంబ. విజయనగరం జిల్లా మక్కువ మండలం శంబర గ్రామంలో వెలసింది ఆ తల్లి. పల్లెసీమలో అమ్మ పండగ  మొదలైంది. సంక్రాంతి తర్వాత సరిగ్గా వారం రోజులకు పోలమాంబ జాతర ప్రారంభమవుతుంది. వారం పాటు జరిగే గిరిజన ఉత్సవానికి అశేష సంఖ్యలో ప్రజలు తరలివస్తారు. వేడుకలో భాగంగా సాగే సిరిమానోత్సవాన్ని చూసేందుకు ఆంధ్రప్రదేశ్‌తో పాటు ఒడిశా, ఛత్తీస్‌గఢ్‌ రాష్ట్రాల నుంచి భక్తులు శంబర తరలి వస్తారు. ఏటికేడు భక్తుల సంఖ్య పెరుగుతుండటంతో ఈ జాతరను పదివారాలు నిర్వహించాలని నిర్ణయించారు. శంబర పరిసరాల్లోని కవిరిపల్లి, తోటవలస, ఎస్‌ఆర్‌పురం, సీబిల్లి పెద్దవలస, బట్టి వలస తదితర ఊళ్లల్లో ముత్యాలమ్మ, బంగారమ్మ తదితర గ్రామ దేవతలకు ప్రత్యేక పూజలు చేస్తారు. ఆయా గ్రామాల్లో రెండు వారాలపాటు అమ్మవారి ఘటాలను ఘనంగా ఊరేగిస్తారు. శంబర జాతరలో ఈ నెల 26, 27, 28 తేదీల్లో నిర్వహించే ఉయ్యాల కంబాల, సిరిమానోత్సవం, అంపకోత్సవం అంగరంగ వైభవంగా సాగుతాయి.
- కొట్యాడ శివకృష్ణ