పంచాంగం వింటున్నారా?

శ్రీ కల్యాణ గుణావహం రిపుహరం దుస్స్వప్నదోషాపహం గంగాస్నాన విశేష పుణ్య ఫలదం గోదానతుల్యం నృణాం ఆయుర్వృద్ధిద ముత్తమం శుచికరం సంతాన సంపత్పద్రం నానాకర్మ సుసాధనం సముచితం పంచాంగ మాకర్ణ్యతామ్‌ అని శాస్త్ర వచనం.

ఉగాదినాడు కొత్త పంచాంగాన్ని పూజించి, పంచాంగ శ్రవణం చేయటం ప్రధానమైన అంశం. పంచాంగం అంటే ఐదు అంశాలతో కూడినది. వరాహ మిహిరుడు తన బృహత్‌ జాతక మొదటి శ్లోకంలో జ్యోతిష శాస్త్రాన్ని సంసార సాగరం దాటడానికి ఉపయోగించే దిక్సూచి అని పేర్కొన్నాడు. అంటే జ్యోతిషం లేదా పంచాంగం అనేవి కాలాన్ని తెలియజేసే మార్గదర్శి అని అర్థం చేసుకోవాలి. తిథి, వార, నక్షత్ర, యోగ, కరణాలు అనే ఐదింటికీ సంబంధించిన కాలపురుషుడి కదలికలను, తత్ఫలితాలనూ తెలియచేసేది పంచాంగం. సంపదల విషయంలో తిథిని, ఆయు రారోగ్యాల విషయంలో వారాన్ని, పాపసంకల్పాలు రాకుండా ఉండే విషయంలో నక్షత్రాన్ని, రోగనిరోధకశక్తిని పెంపొందించుకునే విషయంలో యోగాన్ని, తలపెట్టిన పనులు నిర్విఘ్నంగా నెరవేరటానికి కరణాన్ని గమనించాలని శాస్త్రం చెప్తోంది.