అది కాదు ముఖ్యం!

బోధి వృక్షం

మరణించిన తర్వాత ఈ ప్రపంచం ఎలా ఉంటుంది? మరణానికి సంబంధించిన రహస్యం ఏమిటంటూ ఓ రోజున శిష్యుల్లో ఒకరు బుద్ధుడిని అడుగుతారు. అందుకు బుద్ధుడు చిన్నగా నవ్వుతూ ఇలా అడుగుతాడు... బాణం తగిలి నీ చేతికి గాయం అయిందనుకో. అప్పుడు నువ్వేం చేస్తావు. బాణం తొలగించాలనుకుంటావా? లేక ఆ బాణం ఎక్కడ నుంచి వచ్చిందో వెతకాలనుకుంటావా? ముందు బాణం తీయటానికి ప్రయత్నం చేస్తాను. లేకపోతే అందులోని విషం నా శరీరమంతా వ్యాపిస్తుంది అంటూ సమాధానం చెప్పాడా శిష్యుడు. భేష్‌... నీ సమాధానం చాలా గొప్పది. నువ్వే కాదు ఎవరైనా సరే ఈ పనే చేస్తారు. ప్రపంచంలోని ఏదైనా సమస్యకు ముందు పరిష్కారం ఆలోచించాలి. వ్యక్తి మరణించిన తర్వాత ఈ ప్రపంచం ఏమవుతుందోనని సందేహం అనవసరం అన్నాడు బుద్ధుడు. గురువు అంతరంగాన్ని గ్రహించాడు శిష్యుడు. అర్థమైందంటూ వినయంగా నమస్కరించాడు. శిష్యుడు జిజ్ఞాసను బుద్ధుడు అభినందించాడు.