అందమైన రేయి...

ఇస్లాం సందేశం

ముహమ్మద్‌ ప్రవక్త (స) ప్రియ సహచరులు హజ్రత్‌ అబూబకర్‌ సిద్దీఖ్‌ తన దగ్గర పనిచేసే ఒక సేవకుడి గాథను ఇలా వివరించారు...

నా దగ్గర ఒక యువకుడు పని చేసేవాడు. నమాజులు, రోజాలు పాటించడంలో ఏలోటూ రానిచ్చేవాడు కాదు. ఎంతో ధర్మనిష్ఠాపరుడు. ఒకరోజు అతను నాదగ్గరకొచ్చి రాత్రి తాను కన్న కలను గురించి వివరించాడు. ‘‘తహజ్జుద్‌ నమాజు చేయలేకపోయాను. రాత్రి నేనొక కలగన్నాను. ఆ కలలో మస్జిదు లోపలి భాగంలోని గోడ రెండుగా చీలిపోయింది. అందులోనుంచి స్వర్గలోకపు కన్యలు మెరుస్తూ బయటికొస్తున్నారు. వారిలో ఒకామె అంద వికారంగా ఉంది. చూడటానికి చాలా అసహ్యంగా కనిపిస్తోంది. ఈ ఘటన నన్నెంతగానో ఆశ్చర్యపరిచింది.

నేను ఉండబట్టలేక ‘మీరంతా ఎవరూ?’ అని అడిగాను. ‘మేమంతా నువ్వు తహజ్జుద్‌ నమాజు చేసిన రాత్రులం.’ అని చెప్పారు. ఆ తరువాత అందవికారంగా ఉన్న ఆమె వంక చూపించి... ‘ఈమె ఈరోజు రాత్రి’ అని చెప్పారు. తహజ్జుద్‌ నమాజు గొప్పతనమేంటో అప్పుడు అర్థమైంది . అతనికి. రాత్రి మూడోజామున లేచి చేసే నమాజును తహజ్జుద్‌ నమాజు అంటారు.

- ఖైరున్నీసాబేగం