ఖాళీ ఏదీ?

జెన్‌ కథ

ఒక విశ్వవిద్యాలయ ఆచార్యుడు ఓసారి ప్రముఖ జెన్‌ గురువును కలిసేందుకు వెళ్లాడు. గురువు ఆదరపూర్వకంగా టీ ఒంపుతుంటే, ఆ ఆచార్యుడు ఏదేదో మాట్లాడుతూనే ఉన్నాడు. జెన్‌ గురువు వాటిని శాంతంగా వింటూ ఆ ఆచార్యుడి కప్పు నిండా టీ ఒంపాడు. ఆ తర్వాత కూడా ఆపకుండా అలాగే టీ ఒంపుతూనే ఉన్నాడు. ఆ ఆచార్యుడు నివ్వెరపోయి చూస్తున్నాడు. రెండు క్షణాల తర్వాత ఇక ఆగలేక, ‘కప్పు పూర్తిగా నిండిపోయింది. ఇక అందులో టీ పట్టదు’ అని చెప్పాడు. వెంటనే ఆ గురువు మందహాసం చేస్తూ, ‘నువ్వు కూడా ఈ కప్పులాగే నిండుగా ఉన్నావు. ఇక నేను నీతో ఏం మాట్లాడగలను. ఏం చెప్పగలను’ అన్నాడు. ఆ ఆచార్యుడికి అసలు విషయం అర్థమై అపరాధ భావంతో తల దించుకున్నాడు. ఏదన్నా విషయం గురించి తెలుసుకోవాలంటే మన మనసు నిర్మలంగా ఉండాలి. ఆయా విషయాల గురించి ముందుగానే మనవైన అభిప్రాయాలతో మనసుని నింపేస్తే, కొత్తగా తెలుసుకోవటానికి ఆస్కారం ఉంటుందా?  

- ఎం.అక్షర