సజీవ దైవం

రామకృష్ణ పరమహంస మాధవ అనే శిష్యునితో కలిసి కాశీయాత్రకు బయల్దేరాడు. దారిలో వారికి అనేక అనుభవాలు ఎదురయ్యాయి. ఒకరోజు అలా నడచుకుంటూ వెళ్తుండగా ఆకలికి అలమటిస్తోన్న ఒక పేద కుటుంబం కనిపించింది. వాళ్లకి కొన్నాళ్లపాటు భోజనానికి లోటు లేకుండా కొంత ధనం ఇవ్వమని శిష్యునితో చెప్పాడు పరమహంస.

‘దారి పొడుగునా సాయాలు చేస్తున్నారు. ఉన్న సొమ్మంతా ఇలా ఖర్చయిపోతే మన యాత్ర ఎలా సాగుతుంది గురువర్యా? ఇక ప్రయాణం ఆపేసి మనమిక్కడే ఉండిపోవాల్సి వస్తుందేమో’ కొంచెం దిగులుగా అన్నాడు మాధవ.
పరమహంస ప్రశాంతంగా చూసి ‘మనం కాశీకి వెళ్లి మహాశివుని దర్శించుకోకున్నా ఫరవాలేదు. కళ్లెదురుగా ఉన్న సజీవ దైవాన్ని నిర్లక్ష్యం చేస్తే ఎలా? మానవసేవే మాధవసేవ అని మర్చిపోయావా?!’ అన్నాడు.

శిష్యుడు తన తప్పు తెలుసుకుని తక్షణం గురువాజ్ఞ పాటించాడు.

- లేఖ