అసూయ - ఆశావాదం

బోధిసత్వుడు తన జన్మ పరంపరలో భాగంగా ఒక వ్యాపారుల ఇంట జన్మించాడు. ఒకరోజు బోధి 500 బండ్ల సరుకుతో పడమటి దిక్కునున్న ప్రాంతానికి వెళ్లేందుకు సిద్ధమయ్యాడు. అది దేవదత్తుడనే మరో వర్తకుడికి తెలిసింది. ఈర్ష్యాసూయలతో అతనికంటే ముందు వెళ్లాలని 500 బండ్ల సరుకుతో బయల్దేరాడు. ఆ సంగతి విన్న బోధి ‘వెయ్యి బళ్ళు, వెయ్యిమంది మనుషులతో ఒకేసారి వెళ్తే ఎవరి వ్యాపారమూ సజావుగా సాగదు, ఇద్దరికీ నష్టమేనని ఆలోచించి ‘ముందు నువ్వు వెళ్లు’ అన్నాడు. స్వార్థలోచనుడైన దేవదత్తుడు మరోలా ఆలోచించాడు. ‘నిజమే! ఇద్దరం ఒకేసారి వెళ్తే గిరాకీ ఉండదు. సరకు ధర తగ్గించమంటారు. అందుకు భిన్నంగా నేను ముందు వెళ్తే చెప్పిన ధరకే సరకు అమ్మవచ్చు’ అనుకుని సంతోషంగా ముందు బయల్దేరాడు. బోధి తొందరపడక పోగా ‘ముందు వెళ్ళిన వారి వల్ల దారి మెత్తబడుతుంది, పశువులకు లేత పచ్చిక దొరుకుతుంది, వారి అనుభవాలు తమకు పాఠాలవుతాయి’ అనుకున్నాడు. ముందు వెళ్లిన వర్తకుడు, అతడి అనుచరులను రాక్షసులు అడ్డంగించి చంపి తినేశారు.  

దేవదత్తుడు ఎన్నాళ్లకూ తిరిగి రాకపోయేసరికి బోధి తన బండ్లతో బయల్దేరాడు. రాక్షసులు మనుష్య రూపాలు ధరించి మోసగించాలని చూశారు. భూమి పైన వారి నీడ పడకపోవడంతో బోధి అర్థం చేసుకున్నాడు. విచక్షణతో వారిని తరిమికొట్టి ముందుకు వెళ్లగా చనిపోయిన వర్తకుడు, అనుచరుల ఎముకల పోగులు, సరకు ఉన్న బళ్లు కనిపించాయి. ఆ సరకును కూడా తన బళ్లకు ఎక్కించి బోధి రెట్టింపు లాభం గడించాడు. దేవదత్తుడు అసూయతో ప్రాణాలు పోగొట్టుకుంటే ఆశావాదంతో బోధి ఊహించని లాభం పొందాడు.

- చల్లా జయదేవ్‌