ధర్మరాజు విచారం

కురుక్షేత్ర సంగ్రామంలో బంధువులందరినీ కోల్పోయిన ధర్మరాజు విచారవదనుడై పొగతో కప్పేసిన అగ్నిలా కనిపించాడు. అది చూసిన శ్రీకృష్ణుడు ‘ధర్మరాజా! అపసవ్య ఆలోచనలను చేసేవారు పతనం చెందుతారు. ధర్మనిబద్ధతతో సూటిగా ప్రవర్తించేవారు బ్రహ్మలోకం చేరతారు. అటువంటప్పుడు గతించిన వారి గురించి దుఃఖమెందుకు? ఆ బాధను విడిచిపెట్టలేక పోతున్నాం అంటే.. కామ క్రోధాది అంతఃశత్రువులు, శారీరక, మానసిక వ్యాధులూ కారణం. చుట్టూ అనేకమంది బంధు మిత్రులు ఉన్నంతలో ఒరిగేదేమీ లేదు. అయిపోయిన మహా యుద్ధానికి ఆత్మే నిజమైన తోడు, మనసే పెద్ద విరోధి- అని తెలుసుకోవాలి. లోపలి శత్రువును జయించి మనసుకు ప్రశాంతత కలిగించు. మనోజయమంటే శాంతమేనని తెలుసుకో. బయట ఉండే శత్రువులను ఓడించడం కంటే లోపలి శత్రువుల్ని జయించడమే నిజమైన విజయం, అదే మోక్ష మార్గ సాధనలను నేర్పిస్తుంది- అని తెలుసుకోవాలి’ అంటూ ఉపదేశించడంతో ధర్మరాజులో విచారం మాయమైంది.

 నారంశెట్టి ఉమామహేశ్వరరావు