నమో... భూతనాథా!

రుద్రుడు : సూర్యుడిలోని పరమేశ్వర శక్తి పేరు రుద్రుడు. చరాచర జగత్తు పుట్టుకకు ఇతడే కారణం. సకల ప్రాణుల్లో ఉండే జీవం ఈయనే.
భవుడు : నీటిలో ఉండే శివ చైతన్యం భవుడు. సముద్రంపై నావ ఎలా ఉంటుందో అలా మొత్తం జగత్తు ఈ  చైతన్యంలో తేలియాడుతూ ఉంటుంది.
శివుడు : ఇతని స్థానం భూమి. శరీరాన్ని ఎముకలు  పటిష్ట పరిచినట్టు ప్రాణికోటిని భూమిలోని శివశక్తి పట్టి నిలుపుతుంది.
పశుపతి : ఈ పేరుతో పరమేశ్వరుడు అగ్నిలో ఉంటాడు. అందరిలో ఉండే జఠరాగ్ని ఇతని స్వరూపమే. ఇతని భార్య స్వాహాదేవి.
ఈశ్వరుడు : వాయువులోని ఈశ్వర శక్తి. ప్రాణ, అపాన, వ్యాన, ఉదాన, సమాన అనే అయిదు రూపాల్లో పరమేశ్వర చైతన్యం ఉంటుంది.
భీముడు : ఆకాశంలో పరమేశ్వరుడు భీమ అనే పేరుతో ఉంటాడు. మనిషి శరీరంలో అసంఖ్యాకంగా ఉండే రంధ్రాల్లో ఈశక్తి దాగి ఉంటుంది.
ఉగ్రుడు : యజ్ఞదీక్షలో ఉండే యజమానిని పరమేశ్వరుడు ‘ఉగ్రుడు’ అనే పేరుతో ఆవహించి ఉంటాడు.
మహాదేవుడు : చంద్రుడిలోని శివశక్తి ‘మహాదేవుడు’ అనే పేరుతో ఉంటుంది. పరమేశ్వరుడు చంద్రకిరణాల రూపంతో ఓషధులను శక్తిమయం చేస్తున్నాడు.

పరమేశ్వరుడు లేనిదెక్కడ?

పాంచభౌతికమైన ఈ సృష్టిలో అణువణువూ ఆయన ఉనికితో తేలరిల్లుతోంది. భూమి,గాలి, నీరు,నిప్పు, ఆకాశం... సర్వం శివమయమే. శివపురాణం ప్రకారం ఈశ్వరుడు ఎనిమిది రూపాలతో సకల సృష్టిని అనుగ్రహిస్తుంటాడు. వాటినే అష్టమూర్తులుగా మనం ఆరాధిస్తాం. ఆ రూపాలు మనకు మనం చూసేందంతా శివుడే అని చాటుతాయి.