Updated : 12 Aug 2021 03:42 IST

మనసుకు ప్రతిబింబం...

ఇద్దరు వ్యక్తులు జెన్‌ గురువు దగ్గరికి వెళ్లారు. ఒకవ్యక్తి ‘గురువర్యా! నాది వేరే ఊరు. ఈ పట్టణానికి మారదామని అనుకుంటున్నాను. ఇక్కడ ఎలా ఉంటుంది?’ అని అడిగాడు. దానికి ఆ గురువు, ‘ఇప్పుడు నువ్వుంటున్న ఊరు ఎలాంటిది?’ అని ప్రశ్నించాడు. ‘అబ్బో, దాని గురించి ఎందుకు అడుగుతారులెండి. చాలా దారుణమైన ఊరది. అందరూ పచ్చి స్వార్థపరులు. దుర్మార్గులు. నాకు ఆ ఊరంటేనే పరమ అసహ్యం’ అని వెగటుగా ముఖంపెట్టి చెప్పాడు ఆ వ్యక్తి. వెంటనే ఆ జెన్‌ గురువు ‘ఈ ఊరు కూడా అచ్చం అలాంటిదే. నువ్విక్కడికి రాకుండా ఉండటమే మంచిది’ అన్నాడు. తర్వాత రెండో వ్యక్తి కూడా ఆ ఊరికి తాను మారదామనుకుంటున్న విషయం చెప్పాడు. మళ్లీ ఆ గురువు ప్రస్తుతం అతనుంటున్న ఊరు ఎలాంటిదని అడిగాడు. ‘చాలా మంచి ఊరండీ. అందరూ చాలా స్నేహపూర్వకంగా ఉంటారు. నాకు ఆ ఊరంటే చాలా ఇష్టం. ఇది కొంచెం పెద్ద పట్టణం కదా. ఇక్కడుంటే పిల్లలకి బాగుంటుందని మారదామనుకుంటున్నాను’ అని చెప్పాడు. అందుకు ఆ గురువు ‘ఈ ఊరు కూడా అలాంటిదే. నిరభ్యంతరంగా నువ్విక్కడికి మారొచ్చు’ అని చెప్పాడు. సమాజం మన మనసుకు ప్రతిబింబమే. అది ఎలా చూస్తే అలా కనిపిస్తుందంతే!

- శేషుకుమారి


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts