సిద్ధంగా ఉండాలి

పదిమంది కన్యకలు దీపాలు పట్టుకుని పెళ్లి విందుకు బయల్దేరినట్లుంది అంటూ పరలోక రాజ్యాన్ని వర్ణించారు క్రీస్తు. తెలివైన అమ్మాయిలు నిద్రపోకుండా వెలుగుతున్న దీపాలతో నిరీక్షించి కబురు వినగానే వెళ్లారు. తక్కినవారు నూనెలేని దీపాలతో నిద్రపోయారు.

మనం ఏ సమయంలోనైనా సిద్ధంగా ఉండాలని క్రీస్తు ఇలా పోల్చి చెప్పారు. పిలుపు వచ్చే సమయం తెలియదు గనుక మెలకువగా ఉండమన్నారు. అడవిలో జంతువులు నిరంతరం జాగ్రత్తగా మసలుతాయి. మరి మానసికంగా వికసించిన మనిషి తనను వెంటాడే క్రోధం, ద్వేషం, పగ, అసూయ- అనే జంతువుల విషయమై అప్రమత్తతతో ఉంటున్నాడా అనేది ప్రశ్న! అడవిలో భయపెట్టే మృగాల్లా కక్ష పగ, ప్రతీకారం విరోధులు. అవి మనల్ని మింగేయకుండా మెలకువగా ఉండాలి. ప్రేమ, కరుణ,  సేవ అనే దివిటీలు వెలిగించి సిద్ధంగా ఉందాలి. ఇలా మెలకువగా ఉంటే గాలి పీల్చుకున్నంత తేలికగా, సునాయాసంగా జీవన ప్రయాణం సాగుతుంది.

- అపేక్ష