అల్లాహ్‌ ప్రేమ అపారం

ఓ సందర్భంలో ముహమ్మద్‌ ప్రవక్త ‘ఒక ఒంటె ఎడారిలో తప్పిపోయింది. దాని యజమాని తెచ్చుకున్న అన్నపానీయాలు కూడా ఆ ఒంటె మీదనే ఉన్నాయి. దాని కోసం కాళ్లరిగేలా తిరిగినా లాభంలేక దిగులుగా కూర్చున్నాడు. అలాంటి పరిస్థితిలో తప్పిపోయిన ఒంటె కళ్లముందు ప్రత్యక్షమైంది. ఇక అతడి సంతోషానికి హద్దులు లేవు. సంతోషంతో పొంగిపోయాడు. మీలో ఎవరైనా ధర్మమార్గం తప్పి పాపభావనతో పశ్చాత్తాపం చెందిన తరుణంలో అల్లాహ్‌ మీమీద కరుణ చూపితే.. ఆ ఒంటె యజమాని కంటే ఎక్కువుగా సంతోషిస్తారు. తెలిసో తెలియకో తప్పులు చేస్తుంటాం. వాటివల్ల జరిగిన అనర్థాలకు కుంగిపోనవసరం లేదు. వందలమంది తల్లుల వాత్సల్యం కంటే అల్లాహ్‌ ప్రేమ అధికం. సృష్టిలో అమ్మ ప్రేమకు మించింది లేదంటారు. అలాంటిది అందరు తల్లుల ప్రేమ ఎంత అపారమో కదా! అందుకే ఆ దయామయుడి ప్రేమ ఎలాంటి నిరాశనైనా రూపుమాపుతుంది’ అంటూ ఉద్బోధించారు.
ఖైరున్నీసాబేగం