పామూ - కప్ప

సద్గురువు మార్గదర్శకత్వంలోనే సన్యాసి అయినా, గృహస్థు అయినా ఆధ్యాత్మికంగా పురోగతిని సాధించగలరు. అర్హత లేని గురువు వల్ల ఆశ్రయం ఇచ్చిన వారు, పొందిన వారు- ఇద్దరూ భ్రష్టులవుతారు’ అన్నారు రామకృష్ణ. దాన్ని వివరిస్తూ ఓ సంఘటన గుర్తుచేశారు. ‘నేనో రోజు కోల్‌కతా దక్షిణేశ్వరంలో పంచవటి వైపు వెళ్తున్నాను. ఇంతలో సమీపంలోని సరుగుడు తోపు నుంచి ఒక కప్ప దీనంగా అరవడం వినిపించింది. పెద్దగా పట్టించుకోకుండా కుటీరంలోకి వెళ్లి ధ్యానం చేశాను. అది పూర్తయి తిరిగి వస్తున్నప్పుడు కూడా ఆ కప్ప అలాగే దీనంగా శబ్దం చేస్తుండటంతో ఏమైందని దగ్గరగా వెళ్లి చూశాను. ఓ పాము దాన్ని నోట కరుచుకుని ఉంది. అది సన్నటి నీటిపాము కావటంతో కప్పను మింగలేకపోతోంది. కనీసం వదలడంలేదు. సద్గురువు కాని వ్యక్తి చేతిలో పడిన శిష్యుల పరిస్థితి ఇలాగే ఉంటుంది’ అంటూ చెప్పారు రామకృష్ణ పరమహంస.

బి.సైదులు