ద్వేషించేవాడే ప్రేమించాడు

అతడో మత విద్వేషి. తాను నమ్మిన సిద్ధాంతాన్ని కాపాడుకోవడానికి ఏమైనా చేస్తాడు. అవును క్రీస్తు బోధలను ద్వేషించి వ్యతిరేక భావాలు, సూత్రాలు, సిద్ధాంతాలకు కాపలా సైనికుడిలా పనిచేశాడు. ప్రభువును నమ్మిన ప్రజలను బాధించాడు. ఒకసారి దమస్కో నగరంలోని క్రీస్తు భక్తులపై దాడి చేసేందుకు గుర్రంమీద వెళ్తుండగా ఒక కాంతిపుంజం దూసుకొచ్చి విసిరికొట్టింది. ‘నన్నెందుకిలా హింసిస్తున్నావ్‌?’ అంటూ ఓ స్వరం గర్జించింది. ఆ వెలుగు, స్వరం క్రీస్తువే. అంతే... అతడు మూడు రోజులపాటు కళ్లు తెరవలేదు. అన్నం ముట్టలేదు. ఆ స్వరం వెంటాడింది. పశ్చాత్తాపం చెంది మారిపోయాడు. అతడెవరో కాదు తార్సు పట్టణ వాసి సౌలు. రోమ్‌కు నివాసం మారడంతో పౌలు అయ్యాడు! నాడు అనేక విద్యల్లో సుశిక్షితుడు, నేడు ప్రభువనే కవచం పట్టాడు. చైతన్య గళం విప్పాడు. ఒక విద్వేషి ప్రభు ప్రేమలోకి దిగిన అపురూప ఘట్టం.                
డా.దేవదాసు