అల్లాహ్‌ మార్గం

ఒకరోజు ప్రవక్త (స) తన సహచరులతో కలిసి వెళ్తుంటే ఓ వ్యక్తి తారసపడ్డాడు. అతను కష్టపడి పనిచేస్తాడని తెలిసిన సహచరులు ‘ఇతను పడే శ్రమ అల్లాహ్‌ మార్గంలో అయ్యుంటే గనుక ఎంత బావుండేది?’ అన్నారు నిట్టూరుస్తూ. అది విన్న కారుణ్యమూర్తి (స) ‘అతడు తన తల్లిదండ్రుల పోషణార్థం శ్రమిస్తున్నట్లయితే అల్లాహ్‌ మార్గంలో కష్టపడుతున్నట్లే. భార్యాపిల్లల్ని పోషించేందుకు పాట్లు పడుతుంటే అది కూడా అల్లాహ్‌ మార్గంలో శ్రమిస్తున్నట్లే. లేదూ తనను తాను పోషించుకోవడానికి రెక్కలు ముక్కలు చేసుకుంటున్నాడంటే అప్పుడూ అల్లాహ్‌ మార్గంలో పరిశ్రమిస్తున్నట్లే. కానీ.. పేరుప్రఖ్యాతుల కోసమో, దర్జాలూ దర్పాలు ప్రదర్శించుకోవాలనో, అహంకారాన్ని చాటుకోవడానికో కష్టపడుతుంటే మాత్రం అతడు సైతాన్‌ మార్గంలో కష్టపడుతున్నట్లు’ అంటూ వివరించారు ప్రవక్త.

తహూరా సిద్దీఖా