స్వర్గంలో ఇల్లు

ఒక వ్యక్తి మిత్రుణ్ణి కలవడానికి ఊరెళ్తున్నాడు. అల్లాహ్‌ ఆజ్ఞతో దైవదూత అతన్ని కలిసి ‘ఎక్కడికెళ్తున్నావు, ఎందుకు?’ అనడిగాడు. తానెవరిని కలవడానికి వెళ్తున్నాడో చెప్పాడతడు. ‘అతడి నుంచి నువ్వేమైనా ఆశిస్తున్నావా?’ అంటే.. ‘లేదు, అల్లాహ్‌ మీదున్న అభిమానంతో అతడి వద్దకు వెళ్తున్నాను’ అని బదులిచ్చాడు. దానికాయన ‘నేను దైవదూతను, శుభవార్త అందజేయడానికి వచ్చాను. నువ్వు దేవుడి నిమిత్తం ఆ వ్యక్తిని ప్రేమించావు. కనుక అల్లాహ్‌ నిన్ను తన సన్నిహితుల్లో చేర్చుకున్నాడు’ అన్నాడు. ముహమ్మద్‌ ప్రవక్త తన సహచరులకు చెప్పిన ఈ గాథ ప్రవక్త ప్రవచనాల బుఖారీ గ్రంథం లోనిది.

కపటం, కల్మషం లేకుండా, నిస్వార్థంగా స్నేహం చేసేవారిని అల్లాహ్‌ ప్రేమిస్తాడు, ఆదరిస్తాడన్నది దీని సారాంశం. బంధుమిత్రులెవరైనా అనారోగ్యంతో బాధ పడుతున్నప్పుడు వారిని పరామర్శించడానికి వెళ్లిన వ్యక్తిని ‘నీకు శుభం కలుగుగాక! నువ్వు చాలా అదృష్టవంతుడివి. స్వర్గంలో ఇల్లు నిర్మించు కున్నావు’ అని దైవదూత ఆశీర్వదిస్తాడు’ అంటూ వివరించారు ప్రవక్త.

తహూరా సిద్దీఖా