లక్ష్మీప్రదం

మహాలక్ష్మి చంచల మనస్కు రాలిగా ప్రసిద్ధం. అందుకే గోవు పృష్ఠ భాగంలో (తోక వద్ద) ఉండేలా లక్ష్మి వరం పొందింది. గోవునీ, తులసీమాతనీ పూజించే ఇళ్లలో లక్ష్మి కొలువై ఉంటుంది. ఆ అవకాశం లేనివాళ్లు పటం లేదా ప్రతిమ రూపంలో ఆరాధించవచ్చు. భక్తిశ్రద్ధలున్నచోట లక్ష్మి ఉంటుంది. సాత్విక భావనలో లక్ష్మి ఉంటుంది. దయగల హృదయంలో లక్ష్మి ఉంటుంది. గుమ్మం ముందు ముగ్గులు, ఇంట్లో దీపారాధన లక్ష్మీప్రదం. తినేటప్పుడు మొదటి ముద్దను దైవార్పణం అనుకుంటే ఆహారం అమృతతుల్యమౌతుంది. పర్వదినాల్లో పూజకి కావలసిన పూలూ పత్రాల్లాంటివి భక్తిశ్రద్ధలతో అమర్చడమే ముఖ్యం తప్ప ఆర్భాటాలు కావు. ఏ ఇంటి లోగిలి పరిశుభ్రంగా ఉంటుందో, ఎవరు ప్రసన్నంగా ఉంటూ కుటుంబ శ్రేయస్సు దిశగా పరిశ్రమిస్తారో, నిస్సహాయులకు చేతనైన సాయం చేస్తారో.. ఆ ఇంట లక్ష్మీదేవి స్థిరనివాసం ఏర్పరచుకుంటుంది.

కొండూరి పద్మపార్వతీశం