అంతా ఉత్తమమే!

జపాన్‌ టోక్యో నగరంలో సెన్సోజీ మందిరం ఉంది. జెన్‌ గురువు బాంజాన్‌ ఉండేది అక్కడే. చాలాసేపు ధ్యానం చేసిన తర్వాత మాస్టర్‌కు కాసేపు అలా తిరిగివద్దామనిపించింది. ఆలయం నుంచి బయటికొచ్చి వీధిలో నడుచుకుంటూ వెళ్తున్నాడాయన. కొంత దూరం తర్వాత ఒక మాంసం కొట్టు ఎదురైంది. అక్కణ్ణించి మాటలు పెద్దపెట్టున వినిపిస్తున్నాయి.

‘ఇదిగో చూడు బాబూ! నీ దగ్గరున్న దాంట్లో మంచి మాంసాన్నే ఇవ్వు నాకు’ అంటూ అడుగు తున్నాడో కొనుగోలుదారు.

‘అదేం మాట.. నా అంగట్లో ఉన్నదంతా వంక పెట్టడానికి వీల్లేనంత మంచిదే.. కావాలంటే తమరు పరిశీలించి చూసుకోండి.. బాగోలేని మాంసం.. ఒక్క ముక్క కూడా ఇక్కడ దొరకదు తెలుసా?!’ అంటూ ఎంతో ధీమాగా బదులిచ్చాడు మాంసం అమ్మే వ్యక్తి.

ఈ మాటలు విన్న బాంజాన్‌కు జ్ఞానోదయ మయ్యింది. ‘మాంసం ముక్కలే అంత మంచిగా ఉండేట్లు అతడు జాగ్రత్తపడుతున్నాడంటే... దుర్గుణాలు ఏవీ మనసుకు అంటకుండా మంచితనాన్ని కాపాడుకోవడం ఏమంత కష్టం’ అనుకున్నాడు. హాయిగా నవ్వుతూ ముందుకు సాగిపోయాడు.

వి.నాగరత్న