బలం ఎందుకు ?

ఒకరోజు సాయిబాబా చెట్ల మధ్య తిరుగుతుండగా అక్కడే మేత మేస్తున్న ఒక ఆవు కాలు వేయడంతో ఓ చిన్న మామిడి మొక్క పక్కకు వాలిపోయింది.

సకల ప్రాణుల భాష తెలిసిన సాయి ఆ మొక్కను సరిచేస్తూ ‘ఈ ప్రపంచానికి నీ గురించి తెలియాలంటే ముందు బలంగా నేలలో నాటుకోవాలి. స్థిరంగా, దృఢంగా నిలబడాలి. అప్పుడే నువ్వు భవిష్యత్తులో ఎందరికో నీడను, ఫలాలను ఇవ్వగలుగుతావు’ అన్నాడు.

సాయి ఆ మామిడి మొక్కతో చెప్పిన మాటలు మనకు కూడా వర్తిస్తాయి. శారీరకంగా బలంగా ఉండి ఆరోగ్యాన్ని సంతరించుకుంటేనే మన ఆలోచనలూ మెరుగ్గా ఉండి పక్క దోవ పట్టించవు. బలమైన దేహంలో దృఢమైన బుద్ధి ఉన్నప్పుడు తమ కాళ్ల మీద తాము నిలబడటమే కాక మరో పదిమందికి సాయపడగలరు. సహాయం ఆర్థిక పరమైందే కానవసరం లేదు. మాటలతో మార్గదర్శనం చేయడం, స్ఫూర్తికరమైన ఆలోచనలు కలిగించడం.. ఏదైనా కావచ్చు. సాయి జ్ఞానబోధలు లోతుగా, భావగర్భంగా ఉంటాయని చెప్పడానికి ఇదో ఉదాహరణ.

- డాక్టర్‌ జయదేవ్‌ చల్లా