ఎవరు మహాదాత?

శ్రీకృష్ణునికి ప్రియసఖుడైన అర్జునుడు ఒకసారి ‘బావా! నేనూ దానధర్మాలు చేస్తూనే ఉన్నాను. కానీ కర్ణుడి ఖ్యాతి మాత్రం నాకు దక్కడంలేదు. అందరూ కర్ణుడినే ఎందుకు మహాదాతగా పొగుడు తున్నారు?’ అని వాపోయాడు. అర్జునునికి కర్ణునిదానగుణాన్ని విశదపరచాలనుకున్న శ్రీకృష్ణుడు మర్నాడు ఒక పోటీ ఏర్పాటు చేశాడు. రెండు గజాల ఎత్తున్న ఒక బంగారు కొండను, మరో వెండి కొండను సృష్టించి ‘అర్జునా! ఈరోజు సాయంత్రంలోపు ఈ రెండు కొండలను గనుక నువ్వు దానం ఇవ్వగలిగితే నిన్ను కర్ణునితో సమానంగా మహాదాతగా పరిగణిస్తాను’ అన్నాడు. అర్జునుడు దానమిస్తున్న సంగతి చాటింపు వేసి బంగారం, వెండి ముక్కలు ముక్కలు చేసి అందరికీ దానమివ్వడం ప్రారంభించాడు. సూర్యాస్తమయానికి సగం సగం కొండలు మాత్రమే దానమివ్వగలిగాడు.
మరుసటిరోజు కర్ణుణ్ణి పిలిపించి ‘కర్ణా! సాయంత్రంలోపు ఆ కొండలను రెండింటినీ దానమివ్వు!’ అన్నాడు శ్రీకృష్ణుడు. కర్ణుడు వెంటనే దారిన వెళ్తున్న ఇద్దరు పేదలను పిలిచి ‘అయ్యలారా! మీరు ఈ కొండలలో చెరొకటి తీసుకుని, ఇద్దరూ ఐశ్వర్యవంతులు కావాలని ఆశిస్తున్నాను’ అంటూ వారికి నమస్కరించాడు. వాళ్లు చెరో కొండను బండ్లపై ఎక్కించుకుని సంతోషంగా వెళ్లిపోయారు. శ్రీకృష్ణుడు ‘చూశావా అర్జునా! నువ్వు కొండలను ముక్కలు ముక్కలుగా చేసి దానమిచ్చావు. కర్ణుడు కొండలను మొత్తంగా ఒకేసారి దానమిచ్చాడు. నీకూ కర్ణుడికీ ఉన్న తేడా అదే! అందుకే కర్ణుడు మహాదాతగా కీర్తి అందుకుంటున్నాడు’ అన్నాడు.

- టేకుమళ్ల వెంకటప్పయ్య