పంచ నిధులు

పూర్వం ఒక నిరుపేద కష్టాలకు తాళలేక ఆశ్రమంలో నివాసం ఉంటోన్న ముని వద్దకు వెళ్లాడు. తన పరిస్థితి గురించిచెప్పి ‘స్వామీ! నేనెందుకింతగా పేదరికంతో బాధ పడుతున్నాను? భగవంతుడికి అందరూ సమానమే అంటారు. మరి కొందర్ని ధనికులుగా కొందర్ని నిరుపేదలుగా ఎందుకు పుట్టిస్తున్నాడు?’ అనడిగాడు. ఆ ముని చిరునవ్వు నవ్వి ‘నాయనా! మనం గతజన్మలో చేసుకున్న పాపపుణ్యాల ఫలితంగా జన్మలు కలుగుతుంటాయి. గత జన్మలలో దానధర్మాలు చేయకుండా కఠినంగా ప్రవర్తించినందున ఇలా జరిగింది’ అంటూ చెప్పాడు. ‘అయ్యా! నేనీ జన్మలో దానధర్మాలు చేస్తే కదా.. మరు జన్మలో ధనికుడిగా పుడతాను! కానీ ధనం లేకుండా దానమేం చేయను? అంటే అన్ని జన్మల్లో ఇలా జన్మించాల్సిందేనా?’ అన్నాడు. ముని తల పంకించి ‘నీవద్ద ధనం లేకుంటేనేం పంచనిధులున్నాయి. వాటిని పంచు, సద్గతులు లభిస్తాయి’ అన్నాడు. ‘తిండికే లేక బాధపడుతుంటే పంచ నిధులా?’ అన్నాడతడు. ‘చిరునవ్వు తొలి నిధి. ఉచితంగానే లభిస్తుంది. దాంతో ప్రపంచానికి ఆనందాన్నివ్వొచ్చు. రెండో నిధి కళ్లు. వాటితో ప్రేమాభిమానాలనే అద్భుతాలను పండించి పంచవచ్చు. మూడోది నాలుక. మంచీ చెడూ అన్నిటికీ అదే కారకం. ఆత్మీయంగా మాట్లాడు. నాలుగోది హృదయం. హృద్యంగా స్పందిస్తూ కఠినాత్ములను కూడా ప్రేమాస్పదంగా మార్చవచ్చు. ఆఖరి సంపద శరీరం. దాంతో ఎందరికో సాయం చేయొచ్చు. వీటిల్లో దేనికీ ధనంతో ప్రమేయం లేదు. అది నీ అవసరాలను తీరుస్తుంది. నువ్విలా చేసి చూడు.. వెలుగులు పూయించినట్లవుతుంది. నీ శరీరమే సర్వోత్తమమైంది. అయినదానికీ కానిదానికీ నువ్వు ఏడుస్తూ ఇతరులను ఏడిపించక జన్మను చరితార్థం చేసుకో’ అంటూ ముని జ్ఞానబోధ చేశాడు.                     

- టి.దుర్గాపల్లవి