శాశ్వతానందం కావాలంటే...

ఒకసారి విద్యాప్రకాశానందగిరి స్వామి ‘శాశ్వత ఆనందం లభించాలంటే ఏం చేయాలో మీకో కథ చెబుతాను... ఆంజనేయుణ్ణి ఆరాధించే ఒక వ్యక్తి తన భక్తికి చిహ్నంగా మారుతి బొమ్మను చేతిపై పచ్చబొట్టుగా పొడిపించుకోవాలనుకున్నాడు. అలా దైవ చిత్రాన్ని పదేపదే చూస్తుంటే మరింత తాదాత్మ్యం కలుగుతుందని భావించాడు. వెంటనే పచ్చబొట్టు వేసే మనిషిని పిలిపించాడు. నొప్పి కలుగు తుందా అనడిగితే పచ్చ పొడిచే సమయంలో కొద్దిగా నొప్పి ఉంటుంది, కాస్త ఓర్చుకుంటే చాలు- అంటూ పని ప్రారంభించాడతను. నిమిషం గడిచిందో లేదో భక్తుడు నొప్పికి తాళలేక మారుతిలో ఏ భాగం మొదలుపెట్టావని అడిగాడు. తోక అని బదులిచ్చాడతడు. తోక లేకున్నా పర్లేదు తక్కిన బొమ్మ వేయ మన్నాడు భక్తుడు. సరే అని పచ్చ వేస్తోంటే నొప్పితో మూలిగాడు. ‘మారుతి నడుము వేస్తున్నా కదలొద్దు’ అన్నాడతను. ‘నడుము లేకపోతే మారుతి కాదా? అది వద్దు కానీ తర్వాతి భాగం చూడు’ అన్నాడు బాధగా. ఇలా భక్తుడు పచ్చ పొడుస్తున్న వ్యక్తిని ప్రతిసారీ వద్దని వారిస్తూ తలభాగం చాలన్నాడు. చివరికి అదీ వద్దన్నాడు. నొప్పి తట్టుకోలేక ‘తల లేకుంటేనేం?’ అనేసి మారుతి బొమ్మను పొడిపించుకోకుండానే అతణ్ణి పంపేశాడు. శాశ్వత ఆనందాన్ని పొందాలంటే ఇంద్రియాలకు కలిగే తాత్కాలిక కష్టాలను భరించాలనేది ఇందులో ఉన్న సందేశం. ఆత్మ సుఖాన్ని ఆశించేవారు విషయ సుఖాలకు దూరంగా ఉండాలి’ అంటూ వివరించారు.

పద్మజ