గరుడ పురాణం చదువుకోవచ్చా?

ధర్మసందేహం
గరుడ పురాణం చదువుకోవచ్చా?

గరుడ పురాణం ఎవరైనా కాలం చేసినపుడే చదవాలనీ, వినాలనీ అంటారు. మిగతా సమయాల్లో దీనిని చదవకూడదా?

అష్టాదశ పురాణాల్లో గరుడ పురాణం కూడా ఒకటి. ఇందులో మరణించిన వ్యక్తి ఆత్మ ఊర్ద్వలోకాలకు చేసే ప్రయాణం గురించిన వివరాలు ఉన్నాయి.  ఇంటిలో ఎవరైనా మరణించిన సందర్భంలో దీనిని చదివినా, విన్నా.. మరణించిన వారికి ఉత్తమ గతులు ప్రాప్తిస్తాయని ఒక విశ్వాసం.  మృతుని కుటుంబానికి శుభాలు కలుగుతాయని చెబుతారు. గరుడ పురాణంలో కేవలం నరకంలో విధించే శిక్షల గురించి మాత్రమే చెప్పారనుకుంటే పొరపాటు. అంత్యకాలంలో చేయవలసిన దానాలు, మరణించిన వారికి చేయాల్సిన ఉత్తర క్రియలు, మాతృగర్భంలో జీవుడు పడే వేదన ఇలాంటి ఎన్నో విశేషాలు ఉన్నాయి ఇందులో. ఈ పురాణాన్ని ఇంట్లో ఎవరైనా మరణించినపుడు మినహా మిగతా సమయాల్లో చదవరాదని కానీ, చదివితే దోషం వస్తుందని కానీ ఎక్కడా లేదు. అలా అనుకోవడం మానసిక బలహీనత తప్ప శాస్త్రీయం కాదు. గరుడ పురాణాన్ని ఎప్పుడైనా చదువుకోవచ్చు.