మనసు సమర్పించడమే..

ధర్మ సందేహం

దేవుడికి నివేదన ఎందుకు చేస్తాము?

మన సంప్రదాయంలో షోడశోపచార పూజా విధానం ఉంది. 16 ఉపచారాల్లో నైవేద్యం ఒకటి. అయితే ఈ దేవుడికి ఈ పదార్థం ఇష్టమనీ, అదే నివేదన చేయాలనీ నియమం ఏంలేదు. భక్తులు, భగవంతునిపై ప్రీతితో ఇలా అలవాటు చేసుకున్నారు. అది ఆచారంగా స్థిరపడింది. ‘నివేదన’ అంటే సమర్పించడం కాదు. తెలియజేయడం.. దైవానుగ్రహంతో మనం సంపాదించుకున్న ఆహారాన్ని కృతజ్ఞతాపూర్వకంగా దేవుడికి చూపించడం నివేదన. ‘స్వామీ! నీ అనుగ్రహంతో నేనూ, నా కుటుంబం ఈనాడు ఆహారాన్ని పొందగలుగుతున్నా’మని కృతజ్ఞత తెలియజేయడమే నివేదన. మన ఇంటికి వచ్చిన అతిథికి పదార్థాలను పళ్లెంలో పెట్టి, అందిస్తే. అ అతిథి పదార్థం స్వీకరించి పళ్లెం వదిలేస్తాడు. దైవం మన మనసును స్వీకరించి పదార్థాలను మనకు ప్రసాదంగా ఇస్తున్నాడు. కనుక నివేదనలో మనసే ముఖ్యం కానీ పదార్థం కాదు. మనసును సమర్పించడమే ‘నివేదన’లోని ఆంతర్యం.