పరశురాముడు నిర్మించిన ఆలయం

నల్గొండ జిల్లా నార్కట్‌పల్లి మండలం ఎల్లారెడ్డి గూడెం గ్రామంలో చెరువు గట్టుపై రామలింగేశ్వరాలయం ఉంది. 12వ శతాబ్దం నాటి ఈ ఆలయంలో పరశురాముడు కూడా కొలువై ఉన్నాడు.

స్థల పురాణాన్ని అనుసరించి కార్తవీర్యార్జునుడు పరివారంతో అడవికి వెళ్లాడు. వేట పూర్తయ్యాక జమదగ్ని ఆశ్రమాన్ని దర్శించాడు. మహర్షి ధేనువు సాయంతో సమస్త పరివారానికి షడ్రసోపేత విందు ఏర్పాటుచేశాడు.  ఆ మహాత్మ్యమున్న ధేనువును అడిగితే తిరస్కరించాడని జమదగ్నిని చంపి, ఆవును తీసుకెళ్తున్న కార్తవీర్యార్జునుణ్ణి పరశురాముడు అంతమొందించాడు. క్షత్రియ సంహారం వల్ల కలిగే పాపం అంటకుండా దేశం నలుమూలలా 108 శివలింగాలను ప్రతిష్టించి తపస్సు చేశాడు. ఇక్కడ నెలకొల్పిందే చివరి శివలింగమంటారు.

ఈ ప్రాంతంలో ఎంత తపస్సు చేసినా శివుడు కనికరించరించలేదన్న ఉక్రోషంతో శివలింగానికి తల ఆనించి కొట్టుకోవడంతో శివుడు ప్రత్యక్షమై ఇది పుణ్యక్షేత్రంగా వర్ధిల్లుతుంది, సదా భక్తులను అనుగ్రహిస్తాను- అన్నాడు.

ఇక్కడి రెండు కొండల మధ్యనున్న క్లిష్టమైన చిన్న దారి లోంచి వెళ్తే పెళ్లవుతుందని, సంతానం కలుగుతుందని నమ్ముతారు. చెన్నై, బెంగళూరు, హైదరాబాద్‌ల నుంచి నల్గొండకు బస్సులు, రైళ్లు ఉన్నాయి. అక్కడి నుంచి బస్సు లేదా ఆటోలో నార్కట్‌పల్లి వెళ్లొచ్చు.

బొగ్గరపు వెంకటేష్‌