దూరవిద్యలో ఎంబీఏ ఎలా?

ఫార్మసీ సంస్థలో సప్లై చెయిన్‌ మేనేజ్‌మెంట్‌ ఎగ్జిక్యూటివ్‌గా చేస్తున్నాను. ఉద్యోగంలో ఉన్నతస్థాయిని అందుకోవడానికి ఎంబీఏ చేయాలనుకుంటున్నాను. దూరవిద్యలో ఉన్న అవకాశాలు, వాటి ప్రవేశ వివరాలను తెలపండి. - పి. వైకుంఠరావు

ఉద్యోగం చేస్తూనే ఉన్నత స్థాయికి ఎదగాలనుకునేవారికి ఎంబీఏ లేదా పోస్ట్‌ గ్రాడ్యుయేషన్‌ డిప్లొమా ఇన్‌ మేనేజ్‌మెంట్‌ లాంటి కోర్సులు ఉన్నత అవకాశాలను అందిస్తాయి. ఈ రకంగా ఎంబీఏ కోర్సును చదివేవారి సంఖ్య ఏటా పెరుగుతూ వస్తోంది. మనదేశంలో దూరవిద్య ద్వారా ఎంబీఏ చేయాలనుకునేవారికి ఎన్నో అవకాశాలు ఉన్నాయి. తెలంగాణ రాష్ట్రంలో ఉస్మానియా, కాకతీయ, బీఆర్‌ అంబేడ్కర్‌ ఓపెన్‌ యూనివర్సిటీలూ; ఆంధ్రప్రదేశ్‌ రాష్ట్రంలో ఆంధ్ర, శ్రీ వేంకటేశ్వర, ఆచార్య నాగార్జున, శ్రీ కృష్ణదేవరాయ విశ్వవిద్యాలయాలు దూరవిద్యలో ఎంబీఏని అందిస్తున్నాయి. తెలంగాణలోని యూనివర్సిటీల్లో చదవాలనుకొంటే టీిఐసెట్‌ ప్రవేశ పరీక్షనూ, ఆంధ్రప్రదేశ్‌లోని యూనివర్సిటీల్లో చదవాలనుకొంటే ఏపీఐసెట్‌ ప్రవేశ పరీక్షనూ రాయాలి. పైన పేర్కొన్న రాష్ట్ర విశ్వవిద్యాలయాలతో పాటుగా ఇందిరాగాంధీ నేషనల్‌ ఓపెన్‌ యూనివర్సిటీ కూడా ఎంబీఏను దూరవిద్య ద్వారా అందిస్తోంది. ఇందులో చదవాలనుకొంటే, ఆ యూనివర్సిటీ నిర్వహించే ప్రత్యేక ప్రవేశపరీక్ష ద్వారా అడ్మిషన్‌ పొందవచ్ఛు వీటితో పాటుగా ఇతర రాష్ట్రాలకు చెందిన చాలా ప్రభుత్వ విశ్వవిద్యాలయాలూ, ప్రైవేటు విశ్వవిద్యాలయాలు ఎంబీఏను దూరవిద్య ద్వారా అందిస్తున్నాయి. యూనివర్సిటీ ఆఫ్‌ హైదరాబాద్‌లో పోస్ట్‌ గ్రాడ్యుయేషన్‌ డిప్లొమా ఇన్‌ మేనేజ్‌మెంట్‌ కోర్సును దూరవిద్య ద్వారా చదివే అవకాశం ఉంది.

- ప్రొ. బి. రాజశేఖర్‌, కెరియర్‌ కౌన్సెలర్‌