Updated : 12 Sep 2022 06:30 IST

లాంగ్‌టర్మ్‌ కోచింగ్‌?

ఎంసెట్‌లో మంచి ర్యాంకు రాలేదు. ఏ గ్రూప్‌ తీసుకోవాలో, లాంగ్‌టర్మ్‌ కోచింగ్‌ తీసుకుని మళ్లీ ఎంసెట్‌ రాయాలో నిర్ణయించుకోలేకపోతున్నాను. సలహా ఇవ్వగలరు.

- ఆశ్రిత దేవరకొండ

* ఒకప్పుడు ఎంట్రన్స్‌లో మంచి ర్యాంకు వస్తేనే ఇంజినీరింగ్‌లో సీట్‌ వచ్చేది. ఇప్పుడు చాలా ప్రైవేటు యూనివర్సిటీలు, డీమ్డ్‌ యూనివర్సిటీలు వచ్చాక ఇంజినీరింగ్‌లో సీటు తెచ్చుకోవడం సులువైంది కానీ చదవడం కష్టం అయింది. వీటితో పాటు ప్రైవేటు ఇంజినీరింగ్‌ కళాశాలల్లో బీ కేటగిరీ, ఎన్‌ఆర్‌ఐ సీట్లు కూడా ఉన్నాయి.

ప్రస్తుతం మీ ముందు మూడు ఆప్షన్లు ఉన్నాయి. మొదటిది- ఎంసెట్‌లో మంచి ర్యాంకు రాలేదు కాబట్టి ఇంజినీరింగ్‌ కాకుండా మరేదైనా డిగ్రీ కోర్సు చదవడం. రెండోది- ర్యాంకుతో సంబంధం లేకుండా అధిక ఫీజు కట్టి మంచి ఇంజినీరింగ్‌ కళాశాలలో చేరడం. మూడోది- ఒక సంవత్సరం లాంగ్‌ టర్మ్‌ కోచింగ్‌ తీసుకోవడం. ఇంజినీరింగ్‌ కాకుండా, బీఎస్సీ, బీబీఏ, బీసీఏ, బీకాం, ఐదు సంవత్సరాల న్యాయవిద్య, మల్టీమీడియా లాంటి కోర్సులను ఎంచుకొని బాగా చదివి, మెరుగైన భవిష్యత్తును పొందవచ్చు. మీకు ఆర్థిక స్థోమత ఉంటే ఏదైనా మంచి కాలేజీలో ఇంజినీరింగ్‌లో చేరే ప్రయత్నం చేయండి. దీంట్లో ఉండే ప్రమాదం ఏంటంటే- మీరు చదవబోయే మంచి ఇంజినీరింగ్‌ కాలేజ్‌లో మీకంటే మెరుగైన ప్రతిభకలవారితో పోటీపడాలి. గత అనుభవాలను పరిశీలిస్తే ఇలాంటివారు ప్రతిభావంతులతో పోటీపడటంలో ఇబ్బందులు ఎదుర్కొంటున్నారు. ప్రణాళికాబద్ధంగా చదివి, మీ క్లాస్‌మేట్స్‌తో సమానంగా రాణించగలననే నమ్మకం ఉంటే నిరభ్యంతరంగా ఇంజినీరింగ్‌ కోర్సు చదవండి. ఇక బ్రాంచి విషయానికొస్తే మీరు భవిష్యత్తులో ఏ రంగంలో, ఎలా స్థిరపడాలని అనుకుంటున్నారనేది ఆధారంగా చేసుకొని నిర్ణయం తీసుకోండి. ఇంజినీరింగ్‌ బ్రాంచి కంటే.. ఈ నాలుగేళ్లూ ఎలా చదువుతారు, కమ్యూనికేషన్‌, ప్రాబ్ల్లమ్‌ సాల్వింగ్‌, అనలిటికల్‌, ప్రోగ్రామింగ్‌ నైపుణ్యాలను ఎలా మెరుగుపర్చుకొంటారు అనేవి మీ భవిష్యత్తును నిర్ణయిస్తాయి. ఏడాది పాటు విసుగు లేకుండా, ఇష్టంతో, పట్టుదలతో, ఓపిగ్గా చదవగలననే నమ్మకముంటేనే లాంగ్‌ టర్మ్‌ కోచింగ్‌ గురించి ఆలోచించండి.

- ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts